Crime News: अकोल्यात रक्तरंजित थरार! मुलाला मारताना रोखलं, रागाच्या भरात नवऱ्याने बायकोलाच संपवलं

अकोल्यातून एक थरकाप उडवणारी घटना समोर आली आहे. या घटनेमुळे अकोल्यातील परिसर हादरला आहे. कौटुंबिक वादातून पतीनेच पत्नीची निर्घृण हत्या केल्याची घटना समोर आलीये. या प्रकरणात वृषाली निंबोकार असं मृत महिलेचं नाव असून अनिल निंबोकार असं आरोपी पतीचे नाव आहे.

काय आहे नेमकं प्रकरण?

समोर आलेल्या माहितीनुसार, ही घटना गुरुवारी सकाळच्या सुमारास घडलीये. आरोपी अनिल निंबोकार हा त्यांच्या ८ वर्षांच्या मुलाला मारहाण करत होता. मुलाला वाचवण्यासाठी त्याची आई वृषाली मध्ये पडली. मात्र याच वेळी अनिलचा राग अनावर झाला आणि त्याने हातातील धारदार चाकूने वृषालीच्या पोटात वार केला. या हल्ल्यामध्ये वृषाली गंभीर जखमी झाली.

तातडीने पत्नीला केलं रूग्णालयात दाखल

घटनेनंतर आरोपीने स्वतः जखमी पत्नीला तातडीने रुग्णालयात दाखल केलं. परंतु डॉक्टरांनी तपासणी केल्यानंतर वृषालीला मृत घोषित केलं. या घटनेनंतर आरोपी अनिल निंबोकार स्वतःहून पोलीस ठाण्यात हजर झाला. सध्या त्याला अकोला पोलिसांच्या स्थानिक गुन्हे शाखेच्या ताब्यात ठेवण्यात आलं असून पुढील चौकशी सुरू आहे.

या घटनेमुळे कुटुंबावर दुःखाचा डोंगर कोसळला आहे. विशेष म्हणजे, या घटनेत दोन लहान मुलांचे आई-वडिलांचं छत्र हरवलंय. आईचा मृत्यू झाला असून वडील पोलिसांच्या ताब्यात असल्याने मुलांचे भविष्य अनिश्चित झालंय. या घटनेमुळे सर्वांकडून हळहळ व्यक्त केली जातेय.

प्राथमिक तपासात कौटुंबिक वादातून ही घटना घडल्याचं समोर येतंय. पोलिसांकडून या प्रकरणाचा अधिक तपास सुरू असून नेमकं कारण काय याचा शोध घेतला जात आहे. आरोपीवर कठोर कारवाई करण्याची मागणीही स्थानिकांकडून केली जातेय.