मुंबई : महाराष्ट्र सरकारकडून महिलांच्या सुरक्षेसाठी एक योजना जाहीर करण्यात आली. या योजनेंतर्गत पोलिसांद्वारे रात्री 10 ते सकाळी 6 वाजेपर्यंत महिलांना घरी सोडण्यासाठी मोफत वाहन सेवा उपलब्ध असेल. या सेवेसाठी 1091 आणि 7837018555 हे दोन हेल्पलाईन क्रमांक उपलब्ध करून देण्यात आलेत. आपत्कालीन परिस्थितीत महिला या नंबरवर मेसेज किंवा मिस कॉलसुद्धा देऊ शकतात.

ही सुविधा सगळीकडे उपलब्ध असल्याचे एका पोस्टमध्ये सांगण्यात आलंय. मात्र, ही योजना खरंच महिलांसाठी सुरू करण्यात आली आहे का?...ही योजना सुरू असेल तर तिचा लाभ महिलांना कसा मिळेल? याबद्दल खरी माहिती जाणून घेण्यासाठी आमच्या व्हायरल सत्य टीमने पडताळणी सुरू केली. सरकारने असा कोणता जीआर काढलाय का हे आम्ही पडताळून पाहिलं. त्यामुळे आमच्या पडताळणीत काय सत्य समोर आलं पाहुयात.

आम्ही पोस्टमध्ये शेअर केलेल्या दोन हेल्पलाईन नंबरचा वापर करून तपास सुरू केला.

आम्ही हेल्पलाईन क्रमांक 7837018555 हा नंबर घेऊन गूगलवर सर्च केले.

तेव्हा आम्हाला 2019 मधील एक पोस्ट सापडली ज्यामध्ये महाराष्ट्रातील योजनेचा उल्लेख नव्हता.

चित्तूर, आंध्र प्रदेशमधील महिलांसाठी मोफत राईड योजनेचा उल्लेख आढळून आला.

सिक्कीम, पंजाब, चित्तूर पोलीस रात्रीच्या वेळी महिलांना मोफत राईड देतात.

कर्नाटक पोलीस, लुधियाना पोलिसांनीही हा उपक्रम सुरू केल्याची माहिती मिळाली.

अशा प्रकारे अनेक स्थानिक पोलीसही महिलांना अशी सुविधा देतात.

मात्र, आमच्या पडताळणीत महाराष्ट्रात अशी महिलांसाठी रात्री 10 ते सकाळी 6 पर्यंत घरपोच मोफत राईड योजना असल्याचा दावा असत्य ठरला. अशी कोणतीही सरकारची योजना नाही. मात्र, दिशाभूल करण्यासाठी असे मेसेज व्हायरल केले जातायत.