Vaibhav Suryavanshi Story: IPL मध्ये वयाच्या चौदाव्या वर्षी पदार्पण करणे, पदार्पणाच्या सामन्यात पहिल्याच चेंडूत षटकार मारणे आणि ३५ चेंडूंमध्ये १०० धावा करणे अशा अशक्य वाटणाऱ्या अनेक गोष्टी १४ वर्षांच्या वैभव सूर्यवंशीने शक्य करुन दाखवल्या आहेत. राजस्थान रॉयल्स विरुद्ध गुजरात टायटन्स या सामन्यात वैभवने अनेक विक्रम मोडत इतिहास रचला. सचिन तेंडुलकर, युवराज सिंग, रोहित शर्मा अशा मातब्बरांनी वैभव सूर्यवंशीचे कौतुक केले आहे.

आयपीएलमध्ये पदार्पण करण्यासाठी वैभवने खूप मेहनत घेतली आहे. लहान असल्यापासूनच तो क्रिकेटसाठी तयारी करत आहे. वैभवप्रमाणे त्याच्या आईवडिलांनीही या प्रवासामध्ये खस्ता खाल्या आहेत. आयपीएलपर्यंत पोहोचण्याच्या प्रवासावर वैभव सूर्यवंशीने कालचा (२८ एप्रिल) सामना संपल्यानंतर भाष्य केले. 'मी आज जो काही आहे, तो माझ्या आईवडिलांमुळेच आहे', असे वैभव म्हणाला.

'माझ्या ट्रेनिंग सेशन्ससाठी माझी आई रात्री ११ वाजता झोपते आणि पहाटे २ वाजता उठते. ती जेमतेम ३ तास झोपते. माझ्या वडिलांनी माझ्यासाठी त्यांची नोकरी सोडली. माझा मोठा भाऊ सर्व काम सांभाळतो. मोठ्या कष्टाने तो घर सांभाळत आहे. माझे वडील मला नेहमीच सपोर्ट करतात. जे लोक कठोर परिश्रण करतात, ते कधीही अपयशी होणार नाही याची काळजी देव सदैव घेत असतो. मी आज जे यश मिळवत आहे, ते माझ्या आईवडिलांमुळे आहे', असे वैभव म्हणाला.

'पहिल्या चेंडूवर षटकार मारणे ही माझ्यासाठी सामान्य बाब आहे. भारताकडून अंडर-१९ मध्ये खेळताना किंवा देशांतर्गत क्रिकेट स्पर्धांमध्येही मी पहिल्या चेंडूवर षटकार ठोकला आहे. पहिले १० चेंडू खेळण्यासाठी माझ्यावर कोणताही दबाव नव्हता. चेंडू जर माझ्या हद्दीत आला तर मी शॉट मारेन हे मी ठरवले होते. मला भारतासाठी खेळायचे आहे, त्यासाठी कठोर परिश्रम करावे लागतील. मी त्या पातळीपर्यंत पोहोचेपर्यंत मेहनत करत राहणार. देशासाठी चांगली कामगिरी करण्याचा मी नक्कीच प्रयत्न करेन' असे वक्तव्य वैभव सूर्यवंशीने केले.