कोलकाताच्या इडन गार्डन्सवर मुंबई इंडियन्स संघाला कोलकाता नाईट रायडर्स संघाकडून पराभवाचा सामना करावा लागला आहे. पावसामुळे हा सामना १६-१६ षटकांचा खेळवण्यात आला होता. या सामन्यात प्रथम फलंदाजी करण्यासाठी मैदानात आलेल्या कोलकाता नाईट रायडर्स संघाकडून सुनील नरेनला हवी तशी कामगिरी करता आली नाही. तो शून्यावर बाद होऊन माघारी परतला. दरम्यान गोलंदाजी करताना त्याने १ गडी बाद केला. यासह त्याच्या नावे एका मोठ्या विक्रमाची नोंद झाली आहे.

सुनील नरेनने आतापर्यंत या हंगामात दमदार खेळ करून दाखवला आहे. त्याने गोलंदाजीसह फलंदाजीतही जीव ओतला आहे. त्याच्या या हंगामातील कामगिरीबद्दल बोलायचं झालं तर, त्याने १२ सामन्यांमध्ये ४६१ धावा केल्या आहेत. यादरम्यान त्याने १ शतक आणि ३ अर्धशतक झळकावले असून १०९ धावा ही त्याची सर्वोत्तम खेळी ठरली आहे. यासह गोलंदाजीतही त्याची जादू पाहायला मिळाली आहे. त्याने १५ फलंदाजांना पॅव्हेलियनची वाट दाखवली आहे.

असा रेकॉर्ड करणारा तिसराच खेळाडू

सुनील नरेन हा आयपीएल स्पर्धेच्या एकाच हंगामात १५ गडी बाद करणारा आणि ४०० धावा तिसराच खेळाडू ठरला आहे. त्याच्याआधी हा कारनामा जॅक कॅलिस आणि शेन वॉटसनने करून दाखवला आहे. राजस्थान रॉयल्स संघाचं प्रतिनिधित्व करत असताना शेन वॉटसनने २००८ मध्ये ४७२ धावा करत १७ गडी बाद केले होते. त्यानंतर कोलकाता नाईट रायडर्सकडून खेळताना जॅक कॅलिसने २०१२ मध्ये झालेल्या स्पर्धेत ४०९ धावा करत १५ गडी बाद केले होते.

कोलकाताचा विजय

पावसामुळे उशिराने सुरू झालेला हा सामना १६-१६ षटकांचा खेळवण्यात आला. या सामन्यात हार्दिक पंड्याने नाणेफेक जिंकला आणि प्रथम गोलंदाजी करण्याचा निर्णय घेतला. प्रथम फलंदाजी करताना कोलकाता नाईट रायडर्स संघाने १५७ धावा केल्या. या धावांचा पाठलाग करताना मुंबई इंडियन्स संघाला १३९ धावा करता आल्या.