Leeds च्या हेडिंग्ले स्टेडियमवर भारत विरुद्ध इंग्लंड हा पहिला कसोटी सामना निर्णायक वळणावर पोहोचला आहे. भारताने इंग्लंडसमोर ३७१ धावांचे लक्ष्य ठेवले. पाचव्या दिवशी इंग्लंडसमोर ९० ओव्हर्समध्ये ३५० धावांचे आव्हान असताना पहिल्या सत्राला सुरुवात झाली. सामन्यादरम्यान भारतीय कसोटी क्रिकेटचा नवा कर्णधार शुभमन गिलच्या एका व्हिडीओची चर्चा पाहायला मिळत आहे.

सोशल मीडियावर व्हायरल होणाऱ्या व्हिडीओमध्ये शुभमन गिल भारतीय खेळाडूंचे मनोबल वाढवण्याचा प्रयत्न करत असल्याचे दिसते. बोलत असताना 'एका टोकाला मोहम्मद आहे, तर दुसऱ्या टोकाला कृष्णा' आहे, असे वक्तव्य शुभमन गिलने केले. स्टम्पमाईकमध्ये ही गोष्ट रेकॉर्ड झाली. गिलच्या या वक्तव्याची चर्चा सुरु आहे.

'एकीकडे मोहम्मद (मोहम्मद सिराज) आहे, तर दुसरीकडे कृष्णा (प्रसिद्ध कृष्णा) आहे. दोघेही कहर करतील', असे शुभमन गिल म्हणत असल्याचे व्हिडीओमध्ये ऐकायला मिळत आहे. सध्या भारतासमोर इंग्लंडला रोखण्याचे आव्हान आहे. पहिले सत्र संपेपर्यंत भारताला एकही विकेट मिळालेली नाही. यामुळे गिल सहकाऱ्याचे मनोबल वाढवण्याचा प्रयत्न करत असल्याचे म्हटले जात आहे.

भारत विरुद्ध इंग्लंड सामन्याच्या पहिल्या डावात जसप्रीत बुमराहने पाच विकेट्स घेतल्या होत्या. प्रसिद्ध कृष्णाने ३ आणि मोहम्मद सिराजने २ गडी बाद केले. दुसऱ्या डावामध्ये आतापर्यंत एकही विकेट मिळालेली नाही. पहिल्या कसोटी सामन्यामध्ये भारतीय गोलंदाजांनी (बुमराहचा अपवाद वगळता) फारशी चांगली कामगिरी केली नाही.