कोलकाता नाईट रायडर्स विरुद्ध पंजाब किंग्स हा सामना पावसामुळे रद्द करण्यात आला आहे. सामन्याचा पहिला डाव पूर्ण झाला. दुसऱ्या डावात पहिली ओव्हर झाल्यानंतर लगेच पावसाने एन्ट्री मारली. ११ वाजेपर्यंत पाऊस पडत राहिल्याने सामना रद्द करण्याचा निर्णय घेण्यात आला. यामुळे कोलकाता आणि पंजाब या दोन्ही संघांना १-१ गुण मिळाला आहे. यामुळे पॉईंट्स टेबलमध्ये बदल झाला आहे. पंजाबने एक गुण मिळवत चौथे स्थान गाठले आहे. परिणामी मुंबईचा संघ पाचव्या स्थानावर गेला आहे.

आयपीएल २०२५ मधील ४४ व्या सामन्यात कोलकाता नाईट रायडर्स आणि पंजाब किंग्स हे दोन संघ आमनेसामने आले. श्रेयस अय्यरने टॉस जिंकला आणि प्रथम फलंदाजी करण्याचा निर्णय घेतला. कोलकाताचे खेळाडू गोलंदाजीसाठी मैदानामध्ये उतरले. केकेआरच्या गोलंदाजांनी पंजाबच्या फलंदाजांना २०१ धावांवर रोखले.

सलामीसाठी आलेल्या प्रभसिमरन सिंग आणि प्रियांश आर्य यांनी तगडी सुरुवात केली. ६९ धावा करुन प्रियांश माघारी परतला. श्रेयस अय्यरच्या साथीने प्रभसिमरनने खेळ पुढे नेला. तीन ओव्हर्सनंतर तो कॅचआउट झाला. त्याने ८३ धावा केल्या. कॅप्टन श्रेयस अय्यरने नाबाद २५ धावा, जॉस इंग्लिसने नाबाद ११ धावा केल्या. ग्लेन मॅक्सवेल पुन्हा एका फ्लॉप झाला. दुसऱ्या बाजूला वैभव अरोराने २ विकेट्स घेतल्या. तर आंद्रे रसेल आणि वरुण चक्रवर्ती यांनी प्रत्येकी १-१ विकेट्स घेतल्या. दुसऱ्या इनिंगच्या सुरुवातीला रहमानुल्लाह गुरबाज आणि सुनील नारायण सलामीसाठी आले. पहिल्या ओव्हरनंतर लगेच पाऊस पडायला सुरुवात झाली.

कोलकाता नाईट रायडर्सची प्लेईंग ११ -

रहमानुल्लाह गुरबाज, सुनील नारायण, अजिंक्य रहाणे (कर्णधार), व्यंकटेश अय्यर, रिंकू सिंह, आंद्रे रसेल, रोवमन पॉवेल, वैभव अरोरा, चेतन साकरिया, हर्षित राणा, वरुण चक्रवर्ती.

पंजाब किंग्सची प्लेईंग ११ -

प्रभसिमरन सिंग (यष्टीरक्षक), प्रियांश आर्य, श्रेयस अय्यर (कर्णधार), जॉश इंग्लिस, नेहाल वढेरा, शशांक सिंग, ग्लेन मॅक्सवेल, अजमतुल्लाह अमरजई, युझवेंद्र चहल, अर्शदीप सिंग.