जम्मू-काश्मीरच्या पहलगाम येथे झालेल्या दहशतवादी हल्ल्याने देशभरात संतापाची लाट उसळली आहे. या हल्लाचे पडसाद क्रिकेट जगतावरही पाहायला मिळत आहेत. सध्या देशात आयपीएल सुरु आहे. पहलगाम हल्ल्यानंतर ठिकठिकाणी सुरक्षा वाढवण्यात आली आहे. ज्या स्टेडियममध्ये आयपीएलचे सामने खेळवले जात आहेत, तेथे सुरक्षेसाठी अँटी-ड्रोन सिस्टीम तैनात करण्यात आली आहे. या सिस्टीमचे नाव वज्र सुपर शॉट असे आहे.

शनिवारी (२६ एप्रिल) ईडन गार्डन्सवर झालेल्या कोलकाता विरुद्ध पंजाब सामन्यामध्ये वज्र सुपर शॉट या सिस्टीमचा वापर करण्यात आला होता. आयपीएल ही जगतील सर्वात मोठ्या क्रिकेट लीगपैकी एक आहे. सध्या आयपीएलमध्ये अनेक मोठे खेळाडू सहभागी झाले आहेत. त्यामुळे सुरक्षेच्याबाबतीत कोणत्याही प्रकारचा निष्काळजीपणा होऊ नये याची बीसीसीआय काळजी घेत आहे.

एएनआयने दिलेल्या माहितीनुसार, बीबीबीएसने (बिग बँग बूम सोल्युशन्स प्रायव्हेट लिमिटेड) शनिवारी आयपीएल २०२५ च्या सामन्यांदरम्यान हवाई सुरक्षेसाठी वज्र सुपर शॉट ही स्वदेशी अँटी-ड्रोन प्रणाली तैनात करण्यात आल्याची घोषणा केली. मंगळवारी (२२ मार्च) पहलगाममध्ये झालेल्या हल्यानंतर आयपीएलच्या सामन्यादरम्यान सुरक्षा वाढवण्यात आली आहे.

काय आहे वज्र सुपर शॉट?

वज्र सुपर शॉट हे हलके, हाताने हाताळता येणारे अँटी-ड्रोन शस्त्र आहे. ४ किलोमीटर अंतरापर्यंतचे ड्रोन शोधण्यासाठी आणि त्यांच्या सिग्नलमध्ये व्यत्यय आणण्यासाठी याचा वापर केला जाणार आहे. आयपीएलदरम्यानचे संभाव्य धोके टाळले जावे यासाठी ही सिस्टीम तयार करण्यात आली आहे. पोर्टेबिलिटी आणि अ‍ॅडॉप्टिव्ह फ्रिक्वेन्सी जॅमिंग हे या यंत्रणेचे वैशिष्ट आहे.