Summary -

• व्हेनेझुएलाच्या ताचिरामध्ये खासगी विमान टेकऑफनंतर क्रॅश झाले

• विमान आगीचा गोळा बनत खाली कोसळले

• विमान अपघातामध्ये दोन जणांचा मृत्यू तर दोघे जखमी झाले

• विमान अपघाताचा थरारक व्हिडीओ व्हायरल

अहमदाबाद विमान अपघाताची पुनरावृत्ती झाल्याची आणखी एक घटना समोर आली आहे. वेनेजुएलाच्या ताचिरामध्ये भयंकर विमान अपघात झाला. ताचिरामध्ये एका खासगी विमानाने पॅरामिलो एअरपोर्टवरून उड्डाण घेतलं. उड्डा घेताच हे विमान क्रॅश झाले आणि त्याला आग लागली. आगीचा गोळा बनत हे विमान खाली कोसळले. या विमान अपघातामध्ये दोन जणांचा मृत्यू झाला. दोघांचाही जिवंत जळून मृत्यू झाला. तर दोघे जण गंभीर जखमी झाले.

मिळालेल्या माहितीनुसार, स्थानिक वेळेनुसार हा विमान अपघात सकाळी ९.५२ वाजता घडला. विमानाने टेकऑफ घेतलं पण काही वेळातच विमान क्रॅश झाले. हे विमान रनवेला धडकले त्यानंतर त्याला आग लागली. हा विमान अपघात टायर फुटल्यामुळे झाल्याची प्राथमिक माहिती सांगितली जात आहे. सध्या या विमान अपघाताचा तपास केला जात आहे.

विमान अपघाताची माहिती मिळताच आपत्कालीन सेवा आणि अग्निशमन दलाचे जवान घटनास्थळी पोहोचले आणि त्यांनी आग आटोक्यात आणली. व्हेनेझुएलाच्या नागरी विमान वाहतूक प्राधिकरणाने सांगितले की, अपघाताची चौकशी करण्यासाठी जुंता इन्व्हेस्टिगाडोरा डे अॅक्सिडेंटेस डे एव्हियान्सियन सिव्हिलची एक टीम सक्रिय करण्यात आली आहे. या विमान अपघाताचा व्हिडीओ सोशल मीडियावर व्हायरल होत आहे. विमानाने टेकऑफ केल्यानंतर काही वेळातच नियंत्रण गमावल्याचे दिसून येत आहे.

टेकऑफ घेतल्यानंतर विमानाचे नियंत्रण सुटले. त्यानंतर काही सेकंदातच विमान रनवेवर आदळले आणि आगीच्या भक्ष्यस्थानी पडले. हे जेट नियमितपणे व्हेनेझुएलामध्ये उड्डाण करत होते आणि अलीकडेच त्याने पनामा आणि क्युबाला उड्डाणे पूर्ण केली होती. अधिकाऱ्यांनी सांगितले की, अपघाताचे नेमके कारण तपासले जात आहे. प्राथमिक निष्कर्षांनुसार टायर फुटणे किंवा तांत्रिक बिघाडामुळे हे संभाव्य कारण असू शकते.