Summary -

• उत्तर प्रदेशमध्ये नवऱ्याने बायकोची हत्या केली

• तरुणाने मध्यरात्री बेडरुममध्ये तीन तरुणांसोबत बायकोला आक्षेपार्ह स्थितीत पकडल

• संतापलेल्या नवऱ्याने बायकोची गळा आवळून हत्या केली

• आरोपीने स्वतः पोलिस ठाण्यात जाऊन गुन्हा कबूल केला

उत्तर प्रदेशच्या कानपूरमध्ये एका तरुणाने बायकोची गळा दाबून हत्या केली. ४ महिन्यांपूर्वी दोघांनी पळून जाऊन लग्न केले होते. बायकोला बेडरुममध्ये तीन तरुणांसोबत नको त्या अवस्थेत तरुणाने पाहिले होते. त्यामुळे संतप्त झालेल्या तरुणाने बायकोची हत्या केली. त्यानंतर तरुण स्वत: पोलिस ठाण्यात पोहचला आणि त्याने बायकोची हत्या केल्याचे पोलिसांना सांगितले. पोलिसांनी घटनास्थळी धाव घेत महिलेचा मृतदेह ताब्यात घेत शवविच्छेदनासाठी रुग्णालयात पाठवला. या घटनेमुळे उत्तर प्रदेशमध्ये खळबळ उडाली आहे.

पोलिसांनी दिलेल्या माहितीनुसार, सचिन सिंग असे आरोपीचे नाव असून तो मूळचा फतेहपूर जिल्ह्यातील महानपूर गावचा रहिवासी आहे. शनिवारी तो रडत रडत पोलिस स्टेशनमध्ये आला आणि त्याने पोलिसांना सांगितले की, 'साहेब, मी माझ्या बायकोची गळा दाबून हत्या केली. तिचा मृतदेह घरी ब्लँकेटमध्ये गुंडाळलेला आहे.' यामुळे पोलिस ठाण्यात गोंधळ उडाला. पोलिसांनी या तरुणाला ताब्यात घेत त्याची चौकशी केली. त्यानंतर सचिनने पोलिसांना जे काही सांगितले ते ऐकून पोलिसही चक्रावले.

सचिनचे गावातील श्वेता नावाच्या तरुणीसोबत प्रेमसंबंध होते. दोघांनी चार महिन्यांपूर्वी कुटुंबीयांच्या विरोधात जाऊन कोर्टात लग्न केले होते. कुटुंबाच्या नाराजीमुळे ते दोघे सुरतला राहायला गेले. तिथे सचिन एका कंपनीत कामाला लागला. पण एका महिन्यानंतर ते कानपूरला परतले आणि महाराजपूर परिसरात भाड्याने खोली घेऊन राहायला लागले. सचिनने तिथे ऑटोरिक्षा चालवायला सुरुवात केली. १३ जानेवारी रोजी तो नेहमीप्रमाणे रिक्षा चालवण्यासाठी गेला. मध्यरात्री १ वाजताच्या सुमारास तो घरी आला. पण घरामध्ये त्याने जे चित्र पाहिले ते पाहून त्याच्या तळपायाची आग मस्तकात गेली.

घरी आल्यानंतर सचिनने पाहिले की त्याची बायको बेडवर तीन तरुणांसोबत आक्षेपार्ह स्थितीत होती. हे तिन्ही तरुण नजीकच्या इंजिनिअरिंग कॉलेजमध्ये शिकत होते आणि ते सचिनच्या घरासमोरच राहत होते. संतापलेल्या सचिनने व्हिडीओ बनवायला घेतला तर त्याच्या बायकोने आणि तरुणांनी मोबाईल हिसकावून घेतला आणि त्याला मारहाण केली. आवाज ऐकून शेजारच्यांनी पोलिसांना फोन करून बोलावून घेतलं. पोलिसांनी सचिन, त्याची बायको आणि या तिन्ही तरुणांना पोलिस ठाण्यात नेले.

त्याठिकाणी पोलिसांनी सचिन आणि त्याच्या बायकोची समजूत काढून त्यांना घरी पाठवले तर तिन्ही तरुणांना ताब्यात घेतलं. घरी आल्यानंतर सचिनच्या बायकोने त्याच्याशी भांडण केले. तिन्ही तरुणांना मी सकाळपर्यंत सोडवून आणेल पण तुला सोडणार नाही. दोघांमध्ये कडाक्याचे भांडण झाले. या वादात मध्यरात्री ३ वाजता सचिनने बायकोची गळा आवळून हत्या केली. त्यानंतर तो पोलिस ठाण्यात गेला आणि गुन्हा कबूल केला. पोलिसांनी सचिनविरोधात गुन्हा दाखल करत त्याला अटक केली.