राजस्थानमध्ये कुत्र्यांची गोळ्या झाडून हत्या करण्यात आली.
आरोपीने दोन दिवसांत २५ पेक्षा जास्त भटक्या कुत्र्यांची हत्या केली.
पोलिसांनी आरोपीला अटक करून गुन्हा दाखल केला.
प्राणीप्रेमी आणि नागरिकांनी संताप व्यक्त केला आहे. या घटनेचा व्हिडीओ व्हायरल होत आहे.
राजस्थानमध्ये मानवतेला काळीमा फासणारी घटना घडली. एका व्यक्तीने तब्बल २५ कुत्र्यांची गोळ्या झाडून हत्या केली. राजस्थानच्या झिंझुनू जिल्ह्यात ही घटना घडली. या व्यक्तीने २ आणि ३ ऑगस्ट अशा दोन दिवसांमध्ये २५ पेक्षा अधिक निष्पाप कुत्र्यांचा जीव घेतला. सोशल मीडियावर या घटनेचा व्हिडीओ व्हायरल झाला आहे. ज्यामध्ये ही व्यक्ती कुत्र्यांवर बंदूक रोखताना दिसत आहे. या घटनेचा व्हिडीओ व्हायरल झाल्यानंतर त्याच्याविरोधात पोलिसांनी कारवाई केली.
मिळालेल्या माहितीनुसार, नवलगड परिसरातील कुमावास गावात ही भयंकर घटना घडली. गोळीबाराचा आवाज ऐकून गावातील नागरिक घाबरले. गावातील सर्व कुत्रे आपला जीव वाचवण्यासाठी सैरावैरा पळत होते. दुचाकीवर बसून दोघे जण या कुत्र्यांचा पाठलाग करत होते. दुचाकीवरील एका व्यक्तीच्या हातामध्ये बंदूक होती. ही व्यक्ती समोर दिसेल त्या कुत्र्याला गोळ्या झाडून त्याची हत्या करत होता. एक एक करून असे दोन दिवसांत या व्यक्तीने २५ पेक्षा जास्त कुत्र्यांना मारून टाकलं. कुमावास गावातील रस्त्यावर आणि शेतामध्ये कुत्रे रक्ताच्या थारोळ्यात पडलेले दिसत होते.
या घटनेचा धक्कादायक व्हिडीओ व्हायरल झाल्यानंतर पोलिसांनी आरोपीचा शोध घेण्यास सुरूवात केली. पोलिसांनी या आरोपीला अटक केली. त्याच्याविरोधात प्राणी क्रुरता आणि शस्त्रास्त्र कायद्यांतर्गत गुन्हा दाखल करण्यात आला आहे. ही व्यक्ती डुमरा गावातील रहिवासी आहे. आरोपीची पोलिसांनी कसून चौकशी केली तेव्हा त्याने कुत्र्यांना का मारले यामागचे धक्कादायक कारण सांगितले. आरोपीच्या बकरीला कुत्र्यांनी मारले होते. याचाच राग मनात धरून तो बंदूक घेऊन घरातून बाहेर पडला आणि कुत्र्यांची हत्या केली.
पण डुमरा गावच्या सरपंचाने हे वृत्त फेटाळून लावले आहे. गावामध्ये कुणाची बकरी मेली नाही किंवा कुठल्या कुत्र्याने बकरीला मारले नाही असे त्यांनी सांगितले. आरोपी खोटं बोलत असल्याचे त्यांनी पोलिसांना सांगितले. दरम्यान, या घटनेचा थरारक व्हिडीओ सध्या सोशल मीडियावर व्हायरल होत असून नेटकरी संताप व्यक्त करत आहे. प्राणी प्रेमींनी आरोपीला कठोर शिक्षा द्यावी अशी मागणी केली.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.