इच्छाशक्ती आणि मेहनतीच्या जोरावर कोणताही व्यक्ती आयुष्यात खूप यशस्वी होऊ शकतो. बिकट परिस्थितीशी दोन हात करुन अनेकजण आपले स्वप्न पूर्ण करतात. असंच स्वप्न ओडिशाच्या कंधमाल जिल्ह्याच्या एका १९ वर्षीय मुलाचे पूर्ण झाले आहे. ओडिशाचे एका आदिवासी मुलाने नीट परिक्षेत चांगले गुण मिळवले आहेत.

सनातन प्रधान असे या मुलाचे नाव आहे. त्याचे डॉक्टर होण्याचे स्वप्न आहे. डॉक्टर होण्यासाठी वैद्यकीय प्रवेश परीक्षा नीट पास करावी लागते. सनातन प्रधानने पहिल्याच प्रयत्नात ही परीक्षा पास केली आहे. सनातन हा कंधमाल जिल्ह्याच्या दुर्गम भागात राहतो.त्याने नीटच्या अभ्यासासाठी पुस्तके उधार घेतली होती. पुस्कके उधार घेऊन आणि युट्यूबवर अभ्यास करुन त्याने हे यश मिळवले आहे.

सनातनच्या गावात इंटरनेट नसल्याने तो रोज ३ किलोमीटर लांब जाऊन टेकडीवर अभ्यास करायचा. टेकडीवर बसून त्याने युट्यूबवर अभ्यास केला. सनातनच्या या यशाचे त्याच्या कुटुंबियांना खूप कौतुक आहे.

सनातनचे वडील कनेश्वर प्रधान हे दुर्गम तडीमहा गावात शेती करतात.सनातनने परिस्थिती फार चांगली नव्हती. परिस्थितीशी दोन हात करुन त्याने घवघवीत यश मिळवले आहे. सनातनने कोणत्याही प्रकारचे क्लासेस न लावता नीट परीक्षा पास केली आहे. तो आता सरकरी एकमेजीसी कॉलेजमध्ये प्रवेश घेणार आहे. त्याला सध्या आर्थिक मदतीची गरज आहे.

दरिंगबाडीच्या शासकीय शाळेत दहावीपर्यंतचे शिक्षण पूर्ण केल्यानंतर त्याने बारावीसाठी प्रवेश घेतला. १२ वी पूर्ण केल्यानंतर तो नीटच्या परीक्षेच्या तयारीला लागला. गावात इंटरनेट सेवा नसल्याने त्याने तो रोज तीन ते चार किलोमीटर लांब जाऊन टेकडीवर अभ्यास करायचा. त्याच्या या यशाचं कौतुक करावं तितकं कमीच आहे.