सागर आव्हाड, पुणे

पुण्यामध्ये नात्याला काळीमा फासणारी घटना समोर आली आहे. वडिलांनीच आपल्या ११ वर्षांच्या मुलीवर लैंगिक अत्याचार केल्याची घटना घडली आहे. गेल्या वर्षभरापासून आरोपी आपल्या मुलीवर लैंगिक अत्याचार करत होता. शाळेतील गुड टच बॅड टच उपक्रमातून ही गंभीर घटना उघडकीस आली. शिक्षकांनी दिलेल्या तक्रारीनंतर वारजे माळवाडी पोलिस ठाण्यामध्ये आरोपी बापाविरोधात गुन्हा दाखल करण्यात आला असून त्याला अटक करण्यात आली आहे. पोलिस याप्रकरणाचा तपास करत आहेत.

मिळालेल्या माहितीनुसार, पीडित मुलगी वारजेमध्ये आपल्या आई-वडिलांसोबत राहते. ही मुलगी सहावीमध्ये शिकत असून ती ११ वर्षांची आहे. या मुलीवर तिच्याच वडिलांनी राहत्या घरी जबरदस्तीने लैंगिक अत्याचार केले. मोबाइलमध्ये अश्लिल व्हिडीओ दाखवत बापाने आपल्या पोटच्या मुलीवर लैंगिक अत्याचार केले. गेल्या वर्षभरापासून आरोपीकडून हे लैंगिक अत्याचार सुरू होते. पंकज देवेंद्र ठाकूर (३५ वर्षे) असं अटक कऱण्यात आलेल्या आरोपीचं नाव असून तो मुळचा बिहारचा राहणारा आहे. आरोपीच्या मोबाईलमध्ये अश्लील व्हिडिओ देखील आढळले असल्याची माहिती पुणे पोलीसांकडून देण्यात आली आहे..

पीडित मुलगी शिकत असलेल्या शाळेमध्ये गुड टच बॅट टच उपक्रम राबवण्यात आला होता. या उपक्रमादरम्यान पीडित मुलीने तिच्यासोबत घडलेला सर्व प्रकार शिक्षिकेला सांगितला. त्यावेळी शिक्षिकेला देखील मोठा धक्का बसला. यानंतर शाळेच्या शिक्षकांनी वारजे माळवाडी पोलिस ठाण्यामध्ये धाव घेत याप्रकरणी तक्रार दाखल केली. घटनेचे गांभीर्य लक्षात घेता पोलिसांनी आरोपी बापाविरोधात गुन्हा दाखल करत त्याला अवघ्या काही तासांत अटक केली. आरोपीला कोर्टात हजर करण्यात आले असता कोर्टाने त्याला ४ दिवसांची पोलिस कोठडी सुनावली.