रोहिदास गाडगे, साम टिव्ही

पुणे : पुण्यातील चाकण येथील वासुलीफाटा रोडवर बिरदवडी येथे भरधाव वेगात आलेल्या ट्रकने ओव्हरटेक करताना दुचाकीला जोरदार धडक देत दोन तरुणांना चिरडल्याची घटना घडलीय. या भीषण अपघातात दोन तरुणांचा जागीच दुर्दैवी मृत्यू झाला आहे. या अपघातात ट्रकच्या चाकाखाली आलेले दोघे तरुण जवळपास १५ ते २० फूट फरफटत नेल्याचा थरार स्थानिक नागरिकांनी सांगितला. या प्रकरणी चाकण पोलिसांनी अपघाताची दखल घेऊन घटनास्थळी पंचनामा केलाय. सुजय कडूसकर आणि सोहम कडूसकर असं अपघातात मृत्यू झालेल्या तरुणांची नावं आहेत.

वांगणी-बदलापूर महामार्गावर विचित्र अपघात

दरम्यान, वांगणी-बदलापूर मुख्य हायवेवर आज सकाळच्या सुमारास भीषण अपघात झाला. पावसामुळे इथला डांबरी रस्ता निसरडा झाल्यामुळे तीन वाहनं उलटली. यात दोन मालवाहू पिकअप आणि एका स्कूटरचा अपघात झाला. या अपघातात दोन वाहनचालक गंभीर जखमी झाले आहेत. पावसाळ्यात हा रस्ता वाहन धारकांसाठी जीवघेणा ठरत आहे.

कल्याण-कर्जत राज्य महामार्गावरील वांगणी-बदलापूर रस्त्याच्या काँक्रिटीकरणाचं काम गेल्या वर्षभरापासून सुरू आहे. काही ठिकाणी या रस्त्याला ठेकेदाराने डांबरी पॅच मारले आहेत. मात्र हे पॅच मारताना पुरेशी काळजी न घेतली गेल्यामुळे पावसामुळे रस्ता निसरडा बनला आहे. अवकाळी पावसामुळे हा रस्ता वाहन धारकांसाठी जीवघेणा ठरू लागला आहे. दरम्यान, आज सकाळी याच ठिकाणी अपघात झाला आहे.

पावसामुळे धोकेदायक झालेल्या या रस्त्यावर आज सकाळच्या सुमारास वांगणीतील गणेश घाटाजवळ दोन मालवाहू पिकअप आणि एक स्कूटर घसरली. अपघात इतका भीषण होता की, तीनही वाहनांनी पलटी मारली. सुदैवाने यात कोणतीही जीवितहानी झाली नसली तरी ट्रकचालक आणि स्कूटरचालक गंभीररित्या जखमी झाले आहेत. अपघातानंतर परिसरातील नागरिकांनी धाव घेत मदतीचा हात दिला.