मुंबई पुणेदरम्यान आता आणखी एक महामार्ग प्रस्तावित आहे. मुंबई पुणेदरम्यान तिसरा महामार्ग सुरु केला जाणार आहे. नवीन द्रुतगती मार्गाची निविदा प्रक्रिया पूर्ण झाली आहे. पुढच्या महिन्याभरता या महामार्गाचे भूमिपूजन करुन त्याचे काम सुरु होणार आहे. पहिल्या टप्प्यात अटल सेतू ते कर्जत चौकापर्यंतचे काम केले जाणार आहे. नवीन मार्गाची पुन्हा आखणी केली जाणार आहे.

केंद्रीय मंत्री नितीन गडकरी यांनी मागच्या वर्षी मुंबई-बंगळुरु एक्सप्रेस वेची घोषणा केली होती. मुंबई पुणे महामार्गावर नेहमीच वाहतूक कोंडी असते. त्यामुळे नवीन रस्ता तयार केला जात आहे. नवीन बंगळुरु द्रुतगती रस्त्याचा एक भाग मुंबई पुणेदरम्यान आहे. त्यामुळे मुंबई पुणेदरम्यानच्या रस्त्याचे काम प्राधान्याने व्हावे, यासाठी महत्त्वाची पावले उचलण्यात आली आहेत. यातूनच पागोटे (अटल सेतू) ते चौक (कर्जत) या टप्प्याचे काम सुरु केले जाणार आहे.

चौक (कर्जत) ते शिवरे (खेड शिवापूर) या प्रकल्पासाठी मान्यता दिली असून त्याची निविदा प्रक्रिया पूर्ण झाली आहे. या मार्गावरच्या भूसंपादनाचा विषय मार्गी लागला आहे. हा रस्ता आठपदरी केला जाणार असून भविष्यात सोळा पदरीदेखील केला जाऊ शकतो. यासाठी १०० मीटर जागा संपादित केली जाणार आहे.

या नवीन मार्गासाठी लोणावळा ते खोपोलीदरम्यान नवीन रस्ता तयार करणार आहे. यामध्ये बोगदा आणि उड्डाणपूल असणार आहे. मिसिंग लिंक आणि जुन्या मुंबई पुणे महामार्ग भागात हा रस्ता उपलब्ध होणार आहे.

हा नवीन मार्ग लोणावळ्यातून पवना खोऱ्यातून मुळशीमार्गे खेड शिवापूरला जाणार आहे. येथील शिवरे गावातील रिंग रोडला जोडणार आहे. यामुळे सातारा, सांगली, कोल्हापूरकडे जाणाऱ्यांसाठीही हा रस्ता उपयुक्त ठरणार आहे.