Mumbai : मुंबईत महिलेची दादागिरी, भररस्त्यात महिला पोलिसाला धमकी आणि अर्वाच्च भाषेत शिवीगाळ; व्हिडिओ व्हायरल

संजय गडदे, मुंबई प्रतिनिधी

मरीन ड्राईव्ह परिसरात VVIP मूव्हमेंटदरम्यान महिला ट्रॅफिक पोलिसांना अश्लील शिवीगाळ व धमकी दिल्याची धक्कादायक घटना समोर आली आहे. सायंकाळी सुमारे ५.३० वाजण्याच्या सुमारास NSCI, मरीन ड्राईव्ह येथे वाहतूक नियंत्रणासाठी महिला ट्रॅफिक पोलिस तैनात होत्या. त्यावेळी MH01 CD 8304 क्रमांकाची कार रस्त्यात उभी असल्याने संबंधित महिला पोलिसांनी चालकाला वाहन बाजूला घेण्यास सांगितले.

यावर कारमधून उतरलेल्या एका महिलेने संताप व्यक्त करत महिला ट्रॅफिक पोलिसांशी वाद घालत अश्लील शिवीगाळ केली. “ए *, तुझे कपडे फाटेपर्यंत मारेन… तुझ्या बापाला फोन करू का?” तसेच “नशीबवान आहेस, मी तुला आत्ता मारलं नाही,” अशा शब्दांत धमकी दिल्याचा आरोप आहे.

याचवेळी संबंधित महिलेने स्वतःला एका राजकीय नेत्याची नातेवाईक असल्याचे सांगत दबाव टाकण्याचा प्रयत्न केल्याची माहिती मिळत आहे. घटनेनंतर संबंधित महिला ट्रॅफिक पोलिस तक्रार देण्यासाठी मरीन ड्राईव्ह पोलिस ठाण्यात गेल्या.

मात्र तेथील एका पोलिस अधिकाऱ्याने “ये सब रोज होता है यहाँ,” असे सांगितल्याचेही समोर आले आहे. या घटनेमुळे पोलीस दलातील महिला कर्मचाऱ्यांच्या सुरक्षिततेचा प्रश्न पुन्हा एकदा ऐरणीवर आला असून, संबंधित महिलेवर कारवाई होणार का याकडे सर्वांचे लक्ष लागले आहे.