कोकणात जाणाऱ्या गाड्या भोगद्यात शिरताच काही टोळकी प्रवाशांचे फोन तसेच मौल्यवान वस्तू चोरत असतं. याप्रकरणी तातडीने कारवाई करून पोलिसांनी या चोरांना बेड्या ठोकल्या. यानंतर मुंबई - कलकत्ता या राष्ट्रीय महामार्गावर सिने स्टाईल सापळा रचुन १२ जणांची टोळी महामार्गावरून जाणाऱ्या चालकांना मारहाण करून लूट करायचे. या घटनेचे गांभीर्य लक्षात घेऊन पोलिसांनी १२ तासांच्या आत १२ चोरट्यांना बेड्या ठोकल्या आहेत.

मिळालेल्या माहितीनुसार, मुंबई - कलकत्ता या राष्ट्रीय महामार्गावर १२ जणांची टोळी भंडाऱ्याच्या बायपास महामार्गावरील वैनगंगा नदीच्या पुलावर खिळ्यांची लोखंडी पट्टी महामार्गावर टाकायचे. आणि भरधाव ट्रकसह अन्य वाहनांना सिनेस्टाईल थांबून वाहनातील चालक आणि क्लिनरला लाठ्याकाठ्यांनी मारहाण करीत त्यांच्याकडील रोकड हिसकवायचे.

१२ जणांच्या टोळीनं मागील काही दिवसांपासून भंडाऱ्याच्या बायपास महामार्गावर मध्यरात्री अक्षरशः उच्छाद मांडला होता. १७ डिसेंबरच्या मध्यरात्री या टोळीनं एकापाठोपाठ चार ट्रकला लुटलं. त्यात रायपूर इथून कर्नाटकाकडे तांदूळ घेऊन जाणाऱ्या ट्रकला थांबवून त्याच्या काचा फोडून, चालकाला मारहाण करीत १५ हजारांची रोकड लुटली.

चालकाच्या तक्रारीवरून भंडारा पोलिसांनी तपासाची चक्रे फिरवीत १२ आरोपींना अटक केली. या ट्रक चालकाच्या तक्रारीवरून ही घटना उघडकीस आली. रोड रॉबरी करणाऱ्या १२ जणांच्या या टोळीत खून आणि लुटमार करणारे अट्टल गुन्हेगार, एक शासकीय कर्मचारी, एक ग्रामपंचायत सदस्य आणि पोलिस भरतीपूर्व प्रशिक्षण घेणाऱ्या चौघांचा समावेश आहे.

हे आरोपी भंडारा, गणेशपूर आणि नागपूर जिल्ह्यातील आहेत. या घटनेसाठी आरोपींनी वापरलेली झायलो वाहन, तीन दुचाकी, आरोपींचे मोबाईल, लाठ्याकाठ्या, खिळ्यांची लोखंडी पट्टी पोलिसांनी ताब्यात घेतलं आहे. या गँगमध्ये आणखी कुणाचा सहभाग आहे का? या दृष्टीनं भंडारा पोलिस अधिक तपास करीतं आहेत. एखाद्या प्रकरणात १२ जणांच्या गँगला एकाचवेळी अटक केल्याची भंडारा पोलिसांची ही पहिलीचं मोठी कारवाई आहे.