Mira Bhayander Morcha : मीरा भाईंदरमध्ये अमराठी व्यावसायिकांनी मोर्चा काढून शक्तीप्रदर्शन केले. याला प्रत्युत्तर म्हणून महाराष्ट्र नवनिर्माण सेनेकडून मोर्चा काढण्यात आला. पोलिसांनी सुरुवातीला मोर्चाला परवानगी नाकारली. मनसे आणि ठाकरे गटाच्या कार्यकर्त्यांना आणि पदाधिकाऱ्यांना नोटीसा बजावण्यात आल्या. मोर्च्यादरम्यान अनेक पदाधिकाऱ्यांना पोलिसांनी ताब्यात घेतले होते.

मराठी अस्मितेच्या मोर्चा सुरु झाल्यानंतर पोलिसांनी आंदोलकांची धरपकड करण्यास सुरुवात केली. या मोर्चासाठी एक छोटा चिमुरडा छत्रपती शिवाजी महाराज बनून घोड्यावर बसून सामील झाला होता. धरपकड सुरु झाल्यानंतर त्यालाही घोड्यावरुन खाली उतरवण्यात आले होते. त्यानंतर आंदोलकांना बालाजी हॉटेल चौक ते मीरारोड रेल्वे स्थानकापर्यंत मोर्चा काढण्याची परवानगी देण्यात आली.

मनसे आणि ठाकरे गटाचे अनेक पदाधिकारी आंदोलनस्थळी पोहोचल्यानंतर मीरारोड स्टेशनबाहेर घोषणाबाजी झाली. यादरम्यान घोड्यावर बसून मोर्चात सहभागी झालेल्या मुलाला नेते, पदाधिकाऱ्यांसोबत उभे करण्यात आले. लहान मुलाने जमलेल्या सर्व आंदोलनकर्त्यांसमोर शिवगर्जना/ गारद दिली. आंदोलनस्थळी चिमुकल्याच्या शिवगर्जनेनंतर मोठा जल्लोष पाहायला मिळाला.

मनसेचे ठाणे-पालघर जिल्हाप्रमुख अविनाश जाधव यांना पोलिसांनी मंगळवारी (८ जुलै) पहाडे साडेतीन वाजता ताब्यात घेतले होते. सुरुवातीला काशिमीरा आणि नंतर पालघर पोलीस ठाण्यात त्यांना नेण्यात आले होते. दुपारी बारा-साडेबाराच्या सुमारास त्यांना सोडण्यात आले. त्यानंतर अविनाश जाधव आंदोलनाच्या ठिकाणी पोहोचले. तेथे त्यांनी प्रसारमाध्यमांशी संवाद साधला.