सचिन कदम, साम टीव्ही

रायगड : आगामी निवडणुकीच्या पार्श्वभूमीवर राजकीय घडामोडींना वेग आला आहे. विधानसभा निवडणुकीनंतर ठाकरेंच्या राजन साळवी यांनी शिंदे गटाची साथ धरली. साळवीनंतर ठाकरे गटाचा आणखी एक नेता उद्धव ठाकरेंची साथ सोडण्याचा मार्गावर आहे. ठाकरे गटाचा रोहा तालुका प्रमुख लवकरच ठाकरे गटाची साथ सोडणार असल्याचं निश्चित झालं आहे. रोहा तालुका प्रमुख समीर शेडगे हे लवकरच अजित पवार गटात प्रवेश करणार आहेत. यामुळे कोकणात ठाकरेंना पुन्हा मोठा धक्का बसला आहे.

रायगडच्या रोह्यात ठाकरे गटाला मोठा धक्का बसला आहे. ठाकरे गटाचा रोहा तालुका प्रमुख समीर शेडगे यांनी पक्षाला रामराम ठोकला आहे. शेडगे यंनी पदाचा राजीनामा पक्षाकडे पाठवून दिला आहे. त्यानंतर ते येत्या 13 एप्रिल रोजी अजित पवार गटात प्रवेश करणार आहेत. प्रदेशाध्यक्ष सुनील तटकरे यांच्या उपास्थितीत रोहा येथे हा पक्ष प्रवेशाचा कार्यक्रम होणार आहे.

समीर शेडगे हे पूर्वाश्रमीचे सुनील तटकरे यांचे खंदे समर्थक म्हणून ओळखले जात होते. मात्र आठ वर्षांपूर्वी रोहा नगर पालिका निवडणुकीत नगराध्यक्षपदाची उमेदवारी न मिळाल्याने शेडगे पक्षातून बाहेर पडले आणि अपक्ष निवडणूक लढवली. त्यानंतर शेडगे यांनी शिवसेनेत प्रवेश केला होता.

पुण्यातही ठाकरेंना धक्का

दरम्यान, पुण्यातही काल ठाकरेंना मोठा धक्का बसला. पुण्यातील ठाकरे गटाच्या महिला पदाधिकाऱ्यांनी सामूहिक राजीनामे दिले आहेत. पुण्यातील या महिला पदाधिकाऱ्यांनी ठाकरे गटाचं काम थांबवलं आहे. पक्षातील वरिष्ठ लक्ष देत नसल्याच्या कारणावरून त्यांनी पक्षाचं काम थांबवलं आहे. पुण्यातील या ३२ महिला पदाधिकारी शिंदे गट आणि अजित पवार गटाच्या संपर्कात असल्याचं बोललं जात आहे. त्यांचा लवकरच पक्षप्रवेश होणार असल्याची देखील चर्चा आहे.