Summary -

• परभणी दैठणा येथे मॉर्निंग वॉकसाठी गेलेल्या दोन महिलांना कारने धडक दिली.

• या अपघातात दोन्ही महिलांचा जागीच मृत्यू झाला.

• मृत महिलांमध्ये माजी जिल्हा परिषद अध्यक्षाची पत्नीही होती.

परभणीमध्ये भीषण कार अपघातामध्ये दोन महिलांचा जागीच मृ्त्यू झाल्याची घटना समोर आली आहे. परभणीतील दैठणा येथे ही अपघाताची घटना घडली. मॉर्निंग वॉकसाठी घराबाहेर पडले असता दोन मैत्रिणींना कारने जोरदार धडक दिली. या अपघातामध्ये गंभीर जखमी झालेल्या दोघांचा मृत्यू झाला. या अपघातानंतर घटनास्थळावर तणावाचे वातावरण होते. दोन्ही महिलांचा मृतदेह शवविच्छेदनासाठी रुग्णालयात पाठवण्यात आला आहे.

मिळालेल्या माहितीनुसार, परभणी तालुक्यातील दैठणा येथे हा अपघात झाला. मॉर्निंग वॉकसाठी गेलेल्या २ महिलांचा कारने धडक दिली. परभणी गंगाखेड रस्त्यावरील दैठणापासून २ किमी अंतरावर माळ सोना फाट्याजवळ हा अपघात झाला. या अपघात इतका भीषण होता की त्यामध्ये दोन्ही महिलांचा जागीच मृत्यू झाला.

या अपघातामध्ये माजी जिल्हा परिषद अध्यक्ष उत्तमराव कच्छवे यांच्या पत्नी पुष्पा उत्तम कछवे आणि अजनाबई सुरेशराव शिसोदे या दोघांचा मृत्यू झाला. त्यांच्या मृत्यूचे वृत्त कळताच कुटुंबीयांना मोठा धक्का बसला. दोघींचे मृतदेह शवविच्छेदनासाठी परभणी जिल्हा रुग्णालयात पाठवण्यात आले आहेत. त्यानंतर दोघींचे मृतदेह कुटुंबीयांकडे दिले जाणार आहे. या अपघातानंतर कार चालक फरार झाला आहे. पोलिस आरोपीचा शोध घेत तपास करत आहेत.

दरम्यान, गडचिरोलीमध्ये देखील अशीच अपघाताची घटना घडली आहे. मॉर्निंग वॉकला गेलेल्या ६ तरुणांना भरधाव ट्रकने चिरडले. या अपघातामध्ये चौघांचा जागीच मृत्यू झाला तर दोघे जण गंभीर जखमी झाले आहेत. सहाही जण मित्र होते. हा अपघात गडचिरोली-नागपूर महामार्गावरील काटली येथे झाला. या अपघातानंतर महामार्गावर वाहतूक कोंडी झाली होती. पोलिस अपघाताचा तपास करत आहेत.