Gadchiroli accident: मार्निंग वॉकसाठी गेले अन् काळाने गाठलं! ६ मित्रांना भरधाव वाहनाने चिरडले, भयंकर अपघात

6 youths hit by vehicle in Katli village : गडचिरोलीमध्ये पहाटे पाच वाजता एका अज्ञात वाहनाने सहा जणांना चिरडलेय. या भयंकर अपघातात दोन जणांचा जागीच मृत्यू झाला तर दोन जण जिल्हा सामान्य रुग्णालयात उपचारावेळी मृत पावले. इतर दोन जणांवर उपचार सुरू असून त्यांची प्रकृती गंभीर असल्याचे समजतेय. आज पहाटे पाच ते सहा वाजण्याच्या दरम्यान काटली गावाजवळ हा भीषण अपघात झाला. अपघातानंतर ग्रामस्थ आक्रमक झाले असून रस्ता आडवला आहे. त्यामुळे आरमोरी गडचिरोली महामार्गावर मोठ्या प्रमाणात वाहतूक कोंडी झाली आहे. (Gadchiroli road accident latest news)

गडचिरोली आरमोरी मुख्य मार्गावरील काटली येथील नाल्याजवळ मार्निंग वॉकसाठी गेलेले सहा तरूणांना भरधाव वाहनांने उडवले. दोन जणांचा जागीच मृत्यू झाला, तर दोन जणांनी रूग्णालयात उपचारावेळी प्राण सोडले. दोन तरूणाची प्रकृती अतिशय चिंताजनक आहे. त्यांना पुढील उपचारासाठी नागपूरला हेलिकॉप्टरने रवाना करण्यात आलेले आहे. भीषण अपघातानंतर संतप्त जमावाने रस्त्यावर आंदोलन केले, त्यामुळे महामार्गावर मोठ्या प्रमाणात ट्रॅफिक झाले होते. काटली - साखरा, पोर्लाच्या नागरिकांची मोठ्या प्रमाणात गर्दी जमली. गडचिरोली पोलीसांना माहीती मिळताच गडचिरोली पोलीस तात्काळ घटनास्थळी पोहचले ठाणेदार चव्हाण यांच्या मार्गदर्शनाखाली मदत कार्य व अधिक तपास सुरू आहे.

आज सकाळी 5.30 च्या दरम्यान काटलीचे सहाजण मित्र नित्याप्रमाणे नाल्याजवळ व्यायाम करण्यासाी गेले होते. आरमोरी वरून गडचिरोलीकडे जाणाऱ्या गाडीने सर्वांना उडवले. पिंकू नामदेव भोयर वय 14 वर्ष काटली, तन्मय बालाजी मानकर वय 16 वर्ष काटली यांचा जागीच मृत्यू झाला. दिशांत दुर्याधन मेश्राम, तुषार राजेंद्र मारबते यांना गडचिरोली जिल्हा सामान्य रुग्णालयात नेले असता त्यांना मृत घोषित करण्यात आले आहे. दोन जणांना गडचिरोली वरून नागपूरकडे हेलिकॉप्टरने रवाना करण्यात आलेले आहे. तर क्षितिज तुळनिदास मेश्राम, आदित्य धनजंय कोहपते, हे दोन जण गंभीर जखमी आहेत.