नाशिक जिल्हा कायद्याचा बालेकिल्ला आता या घोषणेने नाशिक दुमदुमून गेले असताना भाजपच्या नेत्यावर आणखी एक गुन्हा दाखल झाला आहे. गेल्या काही दिवसांपासून नाशिक पोलिसांनी राजकीय गुन्हेगारांच्या मुसक्या आवळत धिंड काढत त्यांचा माज जिरवत आहे.

ठाकरे गटातून भाजपमध्ये गेलेले सुनील बागूल यांचे कट्टर समर्थक मामा राजवाडेवर पोलिसांन खंडणीसह जीवे ठार मारण्याचा प्रयत्न केल्या प्रकरणी आणखी एक गुन्हा दाखल केला आहे. 50 हजारांचा हप्ता आणि दारू दिली नाही म्हणून राजवाडेच्या टोळीने पंचवटी भागातील एका रेस्टॉरंट बारमध्ये रात्रीच्यावेळी तोडफोड करत धिंगाणा घातला होता. यावेळी विरोध करणाऱ्या संचालक महिलेचा संशयितांनी विनयभंग केल्याची घटना घडली होती. या प्रकरणी पंचवटी पोलिसांनी संशयित आरोपी आणि कुख्यात गुंड मामा राजवाडेवर अजून एक गुन्हा दाखल करत त्याच्या पाच जणांच्या टोळीला जेरबंद केले आहे.

पोलिस सूत्रांनी दिलेल्या माहितीनुसार, 19 फेब्रुवारी रोजी रात्री साडे अकरा वाजेच्या सुमारास संशयित आरोपी मामा राजवाडे, बाबासाहेब बढे, योगेश पवार, प्रकाश गवळी, विशाल देशमुख, संदीप पवार, लखन पवार, शरद पवार, प्रवीण कुमावत भाजपचा धीरज शर्मा, राहुल बागमार-जैन, चैतन्य कावरे यांच्यासह चार अनोळखी साथीदारांविरुद्ध प्राणघातक हल्ला, तसेच महिलेचा विनयभंग करण्याच्या उद्देशाने तिच्यावर हल्ला चढविणे, खंडणी उकळणे यांसारखे गंभीर गुन्हे पंचवटी पोलिस ठाण्यात भारतीय न्याय संहितेच्या विविध कालमाखाली गुन्हा दाखल करण्यात आला आहे.

फिर्यादीत नेमके काय?

रात्री उशिरा बारमध्ये येऊन मामा राजवाडे आणि त्याचे काही गुंड साथीदारांनी 50 हजारांचा हप्ता मागितला. त्यास नकार दिल्याने टोळीने बारची तोडफोड करण्याची धमकी दिली. तेथे पुन्हा त्याची अजून काही गुंड आले. त्यांनी फुकट दारू मागितली. त्यांना फिर्यादीने नकार दिला असता त्यांनी बारचे शटर बंद करण्याचा प्रयत्न करत पीडितेची वाट रोखून स्त्री मनाला लज्जा वाटेल असे कृत्य केले. तसेच दुसऱ्या दिवशी पुन्हा काही गुंडांना येऊन मामा राजवाडेंच्या माणसांना फुकट पार्सल आणि हप्त्याचे पैसे का देत नाही काय... तुमचे हात पाय तोडून तुमचा माज जिरवतो अशी धमकी दिली आणि लोखंडी गज, कोयत्याने जीवे ठार मारण्याचा प्रयत्न करत दुखापत केली.