ठाकरे गटाला दिवाळीत बंपर लॉटरी! भाजपमधील महिला नेता शिवसेनेच्या वाटेवर, लवकरच पक्षप्रवेश होणार

आगामी स्थानिक स्वराज्य संस्थांच्या निवडणुकींच्या पार्श्वभूमीवर भाजपमध्ये इनकमिंग सुरूच आहे. मात्र, नाशिकमध्ये राजकीयदृष्ट्या उलटे वारे वाहू लागले आहेत. भाजपचे माजी नगरसेवक यांनी शिवसेना ठाकरे गटात प्रवेश करण्याचा निर्णय घेतला आहे. गेल्या काही दिवसांपासून ते नाराज असल्याची चर्चा होती. लवकरच भाजपला सोडचिठ्ठी देणार असल्याची माहिती होती. मात्र, आता त्यांनी भाजपला जय महाराष्ट्र करण्याचा निर्णय घेतला असून, लवकरच माजी नगरसेवक शिवसेना ठाकरे गटात प्रवेश करणार आहेत.

भाजपच्या माजी नगरसेवक संगीता गायकवाड यांनी ठाकरेंच्या शिवसेनेत पक्षप्रवेश करण्याच निर्णय घेतला आहे. सध्या राज्यात माजी नगरसेवकांचा महायुतीच्या पक्षांमध्ये प्रवेश करण्याचा कल वाढत चालला आहे. मात्र, संगीता गायकवाड यांनी महायुतीमधून थेट महाआघाडीमध्ये जाण्याचा निर्णय घेतला आहे.

गेल्या काही दिवसांपासून संगीता गायकवाड भाजपला जय महाराष्ट्र करणार असल्याची चर्चा होती. या चर्चांना आता पूर्णविराम मिळाला आहे. संगीता गायकवाड यांनी ठाकरेंच्या शिवसेनेत जाण्याचा निर्णय घेतला आहे. संगीता गायकवाड यांच्यासह विविध पदाधिकारी आणि कार्यकर्ते ठाकरेंच्या सेनेत प्रवेश करणार आहे.

नाशिकमधून शक्तीप्रदर्शन करत संगीता गायकवाड यांच्यासह कार्यकर्ते मातोश्रीच्या दिशेनं रवाना झाले आहेत. दिवाळीच्या मुहूर्तावर संगीता गायकवाड हाती शिवबंधन बांधून घेतील. गायकवाड यांच्या पक्षप्रवेशामुळे ठाकरेंच्या शिवसेनेची ताकद वाढली असून, नाशिकमध्ये भाजपला मोठा धक्का मानला जात आहे.