भारत नागणे, सोलापूर

विधानसभा निवडणुकीच्या प्रचारादरम्यान सर्वच राजकीय पक्षांचे नेते एकमेकांवर सडकून टीका करताना दिसत आहेत. उपमुख्यमंत्री अजित पवार आणि माळशिरसचे राष्ट्रवादी काँग्रेस शरद पवार गटाचे नेते उत्तम जानकर यांचा आरोपप्रत्यारोप सुरूच आहे. अशात उत्तम जानकर यांनी पुन्हा एकदा अजित पवारांवर निशाणा साधला.

'अजित पवार हे फितूर माणूस निघाले. सध्या ते देवेंद्र फडणवीस यांना मुख्यमंत्री करण्यासाठी राबतायत.', अशी जळजळीत टीका उत्तम जानकर यांनी केली आहे. त्यामुळे राजकीय वर्तुळात चर्चांना उधाण आले आहे. अजित पवार यावर काय उत्तर देतात याकडे सर्वांचे लक्ष लागले आहे.

'अजितदादा यांच्यात धैर्य नाही , तपश्चर्या नाही. अजितदादा वाघ होते भाजपने त्यांची नखं काढून घेतली आहेत. दादा वाघाची शेळी झाली आहेत. म्हातारपणात गुलाबी साडी नेसणे म्हणजे चुकीचे आहे. तरुणपणातच साडी नेसायला पाहिजे होती. आता काय उपयोग.' असा टोलाही जानकर यांनी लगावला.

राज्यात कोणत्या पक्षाला किती जागा मिळतील याचा देखील अंदाज उत्तम जानकर यांनी व्यक्त केला आहे. 'राज्यात महाविकास आघाडीला २०० च्या जागा मिळतील तर अजितदादांच्या फक्त ५ -६ आमदार निवडून येतील. एकनाथ शिंदे यांचे १०-१२ आमदार निवडून येतील. तर भाजपचे ४०-५० आमदार निवडून येतील.' असा दावा ही जानकर यांनी केला आहे.