कोल्हापूरात फुटबॉलच्या खेळाला पुन्हा एकदा गालबोट लागले आहे. फुटबॉलच्या मैदानातच खेळाडूंमध्ये फ्री स्टाईल हाणामारी झाली आहे. पाटाकडील तालीम मंडळ आणि श्री शिवाजी तरुण मंडळ या पारंपरिक प्रतिस्पर्धी संघातील खेळाडूंमध्ये हाणामारी झाली आहे. पोलिसांकडून सौम्य लाठीमार करण्यात आला आहे.

या फुटबॉलच्या मॅचवेळी मैदानात प्रचंड तणाव होता. रविवारी उत्तरेश्वर चषक फुटबॉल स्पर्धेच्या अंतिम सामन्यात फ्री स्टाईल हाणामारी झाली आहे. या फुटबॉल मॅचला ९० वर्षांचा इतिहास आहे. याच खेळात हाणामारी झाल्याने सर्वजण चकीत झाले होते. ही हाणामारी का झाली यामागचे कारण अद्याप समोर आलेले नाही.

कोल्हापूर येथे काल रविवारी उत्तरेश्वर चषक फुटबॉल स्पर्धेचे आयोजन करण्यात आले होते. या स्पर्धेच्या अंतिम सामन्यात अचानक खेळाडूंमध्ये हाणामारी झाली. त्यामुळे मैदानातील प्रेक्षकांना काहीच समजले नाही. या हाणामारीमुळे मैदानात गर्दी झाली होती. ही गर्दी पांगवण्यासाठी पोलिसांनी सौम्य लाठीचार्जदेखील केला. या संपूर्ण हाणामारीचा व्हिडिओ सोशल मीडियावर प्रचंड व्हायरल झाला आहे.

या संपूर्ण हाणामारीचे कारण अद्याप समोर आलेले नाही. परंतु व्हिडिओच्या माध्यमातून पोलिस या घटनेचा तपास करत आहेत. ही हाणामारी का झाली, याबाबत माहिती मिळवण्याचा प्रयत्न करत आहेत.

कोल्हापूरला फुटबॉलची पंढरी म्हणून ओळखले जाते. कोल्हापूरात अनेक फुटबॉलचे सामने होतात. गेल्या ९० वर्षांपेक्षा जास्त काळाची परंपरा फुटबॉल खेळाला लाभली आहे. परंतु आता मैदानातच जर हाणामारी झाल्याने गालबोट लागले आहे. गेल्या अनेक वर्षांमध्ये फुटबॉलच्या मॅचवेळी हाणामारी होण्याच्या घटना सातत्याने वाढत आहे. त्यामुळे दोन्ही संघातील वाद चव्हाट्यावर आला आहे.