• धाराशिवच्या तेरखेडा गावात शिवसेना आणि राष्ट्रवादी गटांमध्ये तुफान राडा

• दगडफेकीत १० ते १२ वाहनांचे नुकसान

• पोलिसांनी दोन्ही गटांतील ४५ जणांविरोधात गुन्हा दाखल

• गावात तणावपूर्ण शांतता

• गावात पोलिसांचा मोठा बंदोबस्त तैनात

बालाजी सुरवसे, धाराशिव

धाराशिवमध्ये राजकारण चांगलेच तापले आहे. तेरखेडा गावात जिल्हा परिषद निवडणुकीच्या कारणातून सत्ताधारी महायुतीतील शिवसेना आणि राष्ट्रवादीच्या दोन गटात तुफान राडा झाला. आमदार तानाजी सावंत आणि माजी आमदार राहुल मोटे यांचे गट आमने- सामने आले. १० ते १२ वाहनांची तोडफोड करण्यात आली. या प्रकरणी पोलिसांनी दोन्ही गटाच्या कार्यकर्त्यांविरोधात गुन्हा दाखल करत तपास सुरू केला आहे. सध्या गावामध्ये पोलिसांचा बंदोबस्त वाढवण्यात आला आहे.

मिळालेल्या माहितीनुसार, धाराशिवच्या तेरखेडा येथे सत्ताधारी महायुतीतील राष्ट्रवादी आणि शिवसेनेमध्ये तुफान राडा झाल्याचे पाहायला मिळाले. रात्री दोन गटांमध्ये तुफान दगडफेक झाली. यावेळी १० ते १२ वाहनांच्या काचा फोडण्यात आल्या. आमदार तानाजी सावंत गटाचा जिल्हा परिषद निवडणुकीतील विजयानंतर उन्माद सुरू असून त्यातूनच हल्ला केल्याचा आरोप राष्ट्रवादीकडून करण्यात येत आहे.

तर विधानसभा आणि जिल्हा परिषदेतील पराभव प्रस्थापितांना पचवता येत नाही त्यामुळे आमच्यावर आरोप केले जात असून कायम वाद उकरून काढला जात असल्याचं मत तानाजी सावंत यांच्या गटाने व्यक्त केलं. राहुल मोटे यांच्या सांगण्यावरूनच हे सारं होत असल्याचा आरोप देखील त्यांनी केला आहे. तर राष्ट्रवादीने स्वतःच्या गाड्या फोडून आमच्यावर आरोप केले असल्याचं सावंत गटाच्या कार्यकर्त्यांकडून सांगण्यात आले.

या प्रकरणी दोन्ही गटांनी परस्परविरोधी तक्रारी दिल्या नसल्याने पोलिसांनी या प्रकरणात स्वतःहून तक्रार दाखल केली. पोलिसांकडून दोन्ही गटांच्या ४५ जणांविरोधात गुन्हा दाखल करण्यात आला आहे. तेरखेडा गावात तणावपूर्ण शांतता असून बंदुकधारी पोलिसांचा फौजफाटा गावात तैनात करण्यात आला आहे. सध्या पोलिसांकडून आरोपींची शोध मोहीम सुरू आहे.