चंद्रपूर : सध्या आयपीएलच्या क्रिकेट मॅच सुरु आहेत. यात रोज रंगतदार सामने बघावयास मिळत असून या मॅचवर जुगार खेळणाऱ्या दोन बुकिंना पोलिसांनी पकडले आहे. तर ३० जणांविरुद्ध गुन्हे दाखल करण्यात आले आहेत. या कारवाईमुळे क्रिकेटवर सट्टा चालवणारी टोळीच पोलिसांच्या हाती लागली आहे. 

चंद्रपूर (Chandrapur) जिल्ह्यातील वरोरा शहरातील बावने लेआउट येथील एका घरात आयपीएल क्रिकेट मॅचवर सट्टा लावला जात होता. सट्टा चालविला जात असलेल्या या घरावर पोलिसांनी धाड टाकत दोघांना ताब्यात घेतले आहे. या कारवाईत ओमप्रकाश देविदास जाधव,
व आशिष गजानन जाधव (रा. वरोरा) हे लॅपटॉप व मोबाईलच्या सहाय्याने इंडीयन प्रिमीयर लिगच्या (आय.पी.एल.) लाईव्ह मॅचवर ग्राहकांसोबत सौदे (IPL Betting) करीत असल्याचे आढळून आले. 

अडीच लाखाचा मुद्देमाल जप्त

पोलिसांना (Police) या जुगाराची माहिती मिळाल्यानुसार केलेल्या कारवाईत घटनास्थळावरून १० मोबाईल, १ लॅपटॉप, १ पेन ड्राईव्ह, २ कॅलक्युलेटर, एक दुचाकी व इतर साहित्य तसेच नगदी रक्कम ३२ हजार रुपये असा एकूण अडीच लाखांचा मुद्देमाल जप्त करण्यात आला आहे. यात एकूण तीस आरोपींविरोधात गुन्हे दाखल करण्यात आले असून ही जिल्ह्याच्या इतिहासातली आजवरची सर्वात मोठी सट्टाविरोधी कारवाई मानली जात आहे.