दिल्ली, ता. ३० जुलै २०२४

राष्ट्रवादी काँग्रेस पक्ष आणि शिवसेना आमदार अपात्रतेच्या सुनावणीबाबत सर्वात महत्वाची अपडेट समोर आली आहे. राष्ट्रवादी आणि शिवसेनेच्या आमदार अपात्रतेची सुप्रीम कोर्टातील सुनावणी एकाच दिवशी होणार आहे. ७ ॲागस्ट रोजी एकाच दिवशी एकापाठोपाठ एक या दोन्ही सुनावण्या पार पडणार आहेत.

याबाबत सविस्तर माहिती अशी की, शिवसेना आणि राष्ट्रवादी आमदार अपात्रता प्रकरणी शरद पवार गट आणि ठाकरे गटाने सुप्रीम कोर्टात धाव घेतली आहे. विधानसभा अध्यक्ष राहुल नार्वेकर यांनी दिलेल्या निर्णयाविरोधात शरद पवार गटाचे जयंत पाटील आणि शिवसेनेचे सुनील प्रभू यांनी याचिका जाहीर केली होती. शिंदे गट तसेच अजित पवार गटातील आमदारांना अपात्र करावे अशी मागणी यामधून करण्यात आली होती.

गेल्या अनेक महिन्यांपासून या प्रकरणी सुनावणी होत नव्हती. अखेर या दोन्ही सुनावण्यांची तारीख आता सुप्रीम कोर्टाने जाहीर केली आहे. ७ ऑगस्ट रोजी शिवसेना तसेच राष्ट्रवादीच्या आमदार अपात्रतेची सुनावणी पार पडेल, दोन्ही सुनावण्या एकापाठोपाठ एक ऐकल्या जातील, असं सर्वोच्च न्यायालयाने स्पष्ट केले आहे.

दरम्यान, याआधी सुप्रीम कोर्टाकडून शिवसेना आमदार अपात्रतेची सुनावणीला सप्टेंबर महिन्यातील तारीख दिली होती. तर काल झालेल्या राष्ट्रवादी आमदार अपात्रतेच्या सुनावणीत दोन्ही प्रकरणे एकदाच ऐकू असे म्हणत ३ ऑगस्टची तारीख दिली होती. त्यानंतर आता शिवसेनेची सुनावणीही त्याचदिवशी घेण्याचा निर्णय सुप्रीम कोर्टाने घेतला आहे.