किडनी हा आपल्या शरीरातील एक महत्त्वाचा भाग मानला जातो. शरीरामध्ये असलेल्या विषारी पदार्थांना फिल्टर करण्याचं काम किडनी करते. हे घटक लघवीद्वारे बाहेर पडतात. किडनीत थोडासा अडथळा आला तर त्याचा परिणाम शरीराच्या अनेक प्रमुख अवयवांवर होण्याची शक्यता असते. अशावेळी शरीर निरोगी ठेवण्यासाठी किडनी निरोगी ठेवणं अत्यंत गरजेचं आहे.

मात्र सध्या चुकीच्या आहार आणि खराब जीवनशैलीमुळे किडनीच्या आरोग्याचं खूप नुकसान होतं. आजकाल लोकांमध्ये किडनीशी संबंधित आजार झपाट्याने वाढ होताना दिसतेय. किडनीच्या आजाराकडे दुर्लक्ष केल्यास अनेक गंभीर समस्या उद्भवू शकतात. किडनी निकामी देखील होऊ शकते. किडनी खराब होण्यापूर्वी शरीरात विविध लक्षणं दिसू शकतात. यापैकी काही लक्षणं लघवीमध्ये देखील दिसून येऊ शकतात. ही लक्षणं कोणती ते पाहूयात.

वारंवार लघवी होणं

वारंवार लघवी होणं हे किडनीच्या नुकसानाचं लक्षण देखील असू शकतं. रात्री लघवी करण्यासाठी वारंवार उठत असाल तर हे किडनी योग्य पद्धतीने काम करत नसल्याचं लक्षण आहे. अशावेळी डॉक्टरांची मदत घेणं फायदेशीर ठरेल.

लघवीला फेस येणं

लघवीमध्ये जास्त प्रमाणात फेस येणं हे किडनीच्या नुकसानाचं लक्षण असू शकत. ज्यावेळी मूत्रपिंड योग्यरित्या कार्य करण्यास सक्षम नसते तेव्हा लघवीमध्ये प्रोटीनची मात्रा वाढते. यामुळे लघवीतून फेस येऊ शकतो.

लघवीला दुर्गंधी येणं

लघवीतील दुर्गंधी देखील किडनीच्या नुकसानाचं लक्षण असू शकतं. ज्यावेळी किडनी नीट काम करू शकत नाही, तेव्हा शरीरात टॉक्सिन पदार्थ पदार्थ जमा होऊ लागतात. यामुळे लघवीत दुर्गंधी येऊ शकते. यावेळी वेळीच डॉक्टरांची मदत घेणं फायदेशीर असतं.

लघवीदरम्यान जळजळ

लघवी करताना वेदना किंवा जळजळ देखील किडनी खराब होण्याचं एक लक्षण असू शकतं. ही समस्या किडनीच्या संसर्गामुळे किंवा किडनीमध्ये स्टोन होण्याच्या समस्येमुळे उद्भवते. मात्र किडनी निकामी होण्यापूर्वी देखील हे लक्षण दिसून येऊ शकतं.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत