आजकाल प्रत्येक स्वयंपाक घरात जेवण बनवण्यासाठी नॉनस्टिक भांडी वापरली जातात. यामध्ये जेवण बनवणे सोपे जाते, शिवाय पदार्थ भांड्याच्या तळाला चिकटण्याचीही भिती नसते. पण तुम्हाला माहित आहे का? याच नॉनस्टिक भांड्यांमध्ये बनवलेले अन्न कर्करोग, थायरॉईड, फुफ्फुसांचे आजार अशा अनेक गंभीर समस्यांचे कारण बनू शकते. हे कसे आणि यापासून वाचण्यासाठी कोणती काळजी घ्यावी याबद्दल पुढे जाणून घेऊया.

नॉनस्टिक भांडी सामान्यतः अॅल्युमिनियम, स्टेनलेस स्टील अशा धातूवर नॉनस्टिक कोटिंग लावून बनवली जातात. या कोटिंगमध्ये पॉलीटेट्राफ्लुरोइथिलीन (PTFE) म्हणजेच टेफ्लॉन हे रसायन वापरले जाते. याशिवाय काही नॉनस्टिक भांड्यांमध्ये सिलिकॉन डायऑक्साइड वापरले जाते. या रसायनांमुळेच नॉनस्टिक भांड्यांमध्ये शिजवलेले अन्न तळाला चिकटण्यापासून रोखले जाते. हे कोटिंग भांड्याच्या आतल्या भागावर असल्यामुळे ते अन्नाच्या थेट संपर्कात येते.

यामुळे रसायन उच्च तापमानात अन्नामध्ये मिसळू शकते. जे तुमच्या आरोग्यासाठी अतिशय हानिकारक ठरते. नॉनस्टिक भांडी गरम केल्यानंतर त्यातून निघणाऱ्या वाफेत विषारी घटक असतात. जे श्वसनामार्गात गेल्यास फुफ्फुसांना नुकसान पोहोचवू शकतात. तसेच पॉलीटेट्राफ्लुरोइथिलीन (PTFE) रासायन शरिरात गेल्यास थायरॉईड, कर्करोग आणि मुत्रपिंडाच्या समस्या तर उद्भवतातच शिवाय गर्भधारणेवरही नकारात्मक परिणाम होतो.

यापासून वाचण्यासाठी नॉनस्टिक भांड्यांमध्ये जेवण बनवताना योग्य काळजी घेणे आवश्यक आहे.

१. नॉनस्टिक भांडी २६० अंश सेल्सियस तापमानापेक्षा जास्त गरम करणे टाळा.

२. कोटिंग खराब झालेली व ओरखडलेली नॉनस्टिक भांडी वापरणे टाळा.

३. नॉनस्टिक भांड्यांमध्ये स्टीलचे चमचे वापरल्यास कोटिंग खराब होऊ शकते. लाकडी किंवा सिलिकॉनचे चमचे वापरा.

४. PFOA मुक्त असलेली नॉनस्टिक भांडी वापरा.