अनेक जण अचानक वाढलेल्या गळतीमुळे आणि टक्कल पडण्याने त्रस्त असतात. यावेळी केवळ सौंदर्याशी निगडित समस्या मानून दुर्लक्ष केलं जातं. पण तुम्हाला माहीत आहे का की, अचानक पडणारं टक्कल हे हृदयाच्या आरोग्याशी संबंधित असू शकतं? डॉक्टरांचे म्हणणं आहे की, केस गळणं आणि हृदयविकाराचा झटका यांचा थेट संबंध आहे.

प्रसिद्ध हृदयरोगतज्ज्ञ डॉ. बिमल छाजेड यांच्या मते, केस अचानक गळणं हे फक्त हार्मोन्समधील बिघाड किंवा आनुवंशिक कारणांमुळे होत नाही. संशोधनात असं आढळून आलं आहे की टक्कल आणि हृदयविकाराचा धोका हे एकमेकांशी जोडलेले आहेत. ज्यांना अचानक केस गळून टक्कलपणाची समस्या निर्माण होते, त्यांच्यात हृदयविकाराची शक्यता जास्त असते.

टक्कलपणा म्हणजे हृदयविकाराचा इशारा

जर तुमचे केस अचानक गळून टक्कलपणात बदलत असतील तर तो शरीरात होणाऱ्या रक्ताभिसरणातील बिघाडाचा संकेत असू शकतो. ज्यावेळी हृदय योग्य प्रकारे रक्तपुरवठा करू शकत नाही तेव्हा टाळूपर्यंत पुरेसा ऑक्सिजन आणि पोषणद्रव्य पोहोचत नाहीत. त्यामुळे केस झपाट्याने गळू लागतात.

जीवनशैलीचा परिणाम

अस्वस्थ आहार, व्यायामाचा अभाव, धूम्रपान आणि मद्यपान यांचा परिणाम केवळ हृदयावरच होत नाही तर अकाली केस गळतीवरही होतो. विशेषतः ३० वर्षांनंतर जर केस गळतीची समस्या झपाट्याने वाढत असेल तर त्याकडे दुर्लक्ष करू नये.

अशी लक्षणं दिसल्यास काय करावं?

• जर अचानक केस गळती वाढली असेल, तर त्वरित त्वचारोगतज्ज्ञ आणि हृदयरोगतज्ज्ञ यांची सल्लामसलत घ्यावी.

• रक्तदाब, कोलेस्टेरॉल आणि साखरेची पातळी तपासून घ्यावी.

• दररोज किमान ३० मिनिटे व्यायाम करावा आणि संतुलित, पौष्टिक आहार घ्यावा.

• धूम्रपान आणि मद्यपान यापासून दूर राहावे.

वेळीच काळजी घेतल्यास केवळ केस गळतीवर नियंत्रण ठेवता येतं असं नाही तर हृदयविकाराचा धोका टाळताही येतो. आरोग्यदायी आहार, सकारात्मक जीवनशैली आणि नियमित आरोग्य तपासणी हीच सर्वात मोठी गरज आहे. याशिवाय नेमकी समस्या काय आहे हे ओळखता येणार नाही.