Stroke warning signs: स्ट्रोक येण्यापूर्वी तुमच्या शरीरात होतात 'हे' ६ बदल; सामान्य लक्षणं समजून दुर्लक्ष करू नका

स्ट्रोक म्हणजे अशी स्थिती ज्यामध्ये मेंदूपर्यंत पोहोचणारा रक्तपुरवठा थांबतो किंवा मेंदूतील एखादी रक्तवाहिनी फुटू लागते. अशा वेळी मेंदूचे नुकसान होण्याची शक्यता असते. मुख्य म्हणजे याचा शरीराच्या काही भागांवर कायमस्वरूपी परिणाम होऊ शकतो किंवा गंभीर परिस्थितीत मृत्यू देखील होऊ शकतो.

कोणत्याही गंभीर आजारांचे संकेत शरीर आपल्याला देत असतं. त्याचप्रमाणे स्ट्रोक येण्याआधी देखील शरीर तुम्हाला संकेत देऊ लागतं. अशावेळी शरीर जे संकेत देतं ते ओळखणं फार महत्त्वाचं आहे. हे बदल कोणते आहेत ते जाणून घेऊया.

अचानक आणि तीव्र डोकेदुखी

जर कोणत्याही कारणाशिवाय तीव्र आणि सहन न होणारी डोकेदुखी होत असेल तर ते स्ट्रोकचं संकेत असू शकतं. ही डोकेदुखी सामान्य वेदनांपेक्षा वेगळी वाटते. मेंदूत रक्ताचा गाठ तयार झाल्यास अशा प्रकारची वेदना जाणवते.

सतत येणाऱ्या उचक्या

सतत आणि न थांबणाऱ्या उचक्या देखील स्ट्रोकचं लक्षण असू शकतात. तज्ज्ञांच्या मते हे लक्षण विशेषत: महिलांमध्ये जास्त आढळतं. मेंदूतील मेडुला हा भाग श्वासोच्छ्वास आणि गिळण्याचं काम नियंत्रित करतो. या भागावर परिणाम झाल्यास उचक्या थांबत नाहीत.

मळमळ आणि उलट्या

स्ट्रोकपूर्वी शरीरात ताण वाढल्यामुळे ‘कॉर्टिसोल’ आणि ‘अ‍ॅड्रेनालिन’ हे हार्मोन्स जास्त प्रमाणात तयार होतात. त्यामुळे रक्तवाहिन्या आकुंचन पावतात. रक्तदाब आणि शुगरमध्ये असंतुलन असलेल्या व्यक्तींमध्ये रक्ताच्या गुठळ्या तयार होण्याचा धोका वाढतो. या बदलांमुळे मेंदूत दाब वाढतो आणि मळमळ किंवा उलट्या होऊ शकतात.

छातीत वेदना

हृदयविकाराच्या झटक्यात जशी छातीत तीव्र दाबाची भावना येते. यावेळी छातीत जळजळ, आवळल्यासारखं वाटणं किंवा अस्वस्थता जाणवू शकते. मेंदूतल्या रक्तवाहिनीत गुठळी तयार झाल्यामुळे रक्त आणि ऑक्सिजनचा पुरवठा कमी होतो, ज्यामुळे असं लक्षण दिसू शकतं.

मानसिक गोंधळ

अचानक बोलताना अडचण येणं, नेहमीच्या गोष्टी आठवायला त्रास होणं किंवा काही काळासाठी स्मरणशक्ती गोंधळलेली वाटणं हे लक्षण हलक्यात घेऊ नका. हे स्ट्रोक येण्याचं महत्वाचं पूर्वलक्षण असू शकतं.

चेहरा किंवा हात-पाय सुन्न होणं

स्ट्रोकपूर्व अवस्थेत चेहऱ्यावर लोंबकळल्यासारखं होणं, ओठ वाकडे होणं, हात किंवा पायात अचानक अशक्तपणा येणं किंवा सुन्न होणं अशी लक्षणं दिसतात. कारण स्ट्रोकमध्ये मेंदूचा तो भाग प्रभावित होतो जो स्नायूंचं नियंत्रण आणि समन्वय साधतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.