Early signs of heart inflammation: हृदयाला सूज आल्यास सुरुवातीला शरीरामध्ये दिसतात ७ मोठे बदल; दुर्लक्ष करणं बेतू शकतं जीवावर

आजकाल हृदयासंबंधीच्या अनेक समस्या आपल्याला सतावतात. यापैकी एक म्हणजे हृदयाला सूज येणं. हृदयात सूज येणं ही एक गंभीर आरोग्याची परिस्थिती मानली जाते. ही एक अशी स्थिती आहे जी कोणत्याही वयोगटातील लोकांमध्ये होऊ शकते. वैद्यकीय भाषेत या स्थितीला मायोकार्डिटिस म्हणतात.

या स्थितीमध्ये हृदयाच्या स्नायू आणि नसांमध्ये सूज येते. परिणामी हृदयाला रक्त योग्यरित्या पंप करण्यात अडचण येऊ शकते. रक्त पंप करू न शकल्याने हृदयाशी संबंधित गुंतागुंत वाढू शकते. काही गंभीर प्रकरणांमध्ये, रुग्णाचे हृदय इतके कमी होतात की, शरीराच्या इतर भागांपर्यंत रक्त पोहोचणं कठीण होतं. यावेळी हृदयविकाराचा झटका आणि स्ट्रोक सारख्या परिस्थितींचा धोका देखील वाढू शकतो.

हृदयाला सूज आल्यावर काय होतं?

हृदयाच्या स्नायू किंवा बाह्य थराला सूज येण्याला मायोकार्डिटिस किंवा पेरीकार्डिटिस म्हणतात. ही परिस्थिती शरीरात विषाणू, संसर्ग किंवा हानिकारक पदार्थांच्या संपर्कात आल्यामुळे होते. यामुळे हृदयाची काम करण्याची क्षमता कमी होऊ शकते. कधीकधी सामान्य सर्दी, फ्लू किंवा कोविड-१९ सारख्या इन्फेक्शनंतर हा त्रास होऊ शकतो.

वेळेवर काळजी न घेतल्यास ही परिस्थिती प्राणघातक देखील ठरू शकते. परंतु जर लक्षणं लवकर लक्षात आली आणि काही योग्य ती काळजी घेतली की परिस्थिती हाताबाहेर जाण्यापासून वाचू शकते.

हार्टला सूज येण्याची लक्षणं

• छातीत दुखणं किंवा जडपणा

• विश्रांती घेत असतानाही श्वास घेण्यास त्रास होणं

• खूप थकवा जाणवणं

• जलद किंवा अनियमित हृदयाचे ठोके

• पायांमध्ये सूज येणं

• गुडघ्याखालील भागात सतत सूज येणं

• चक्कर येणं किंवा अशक्त होणं

मुख्य गोष्ट म्हणजे सहसा लोकं ही लक्षणं क्षुल्लक मानतात. कारण, पोटात गॅस तयार होणं किंवा वाढलेली चिंता यासारख्या परिस्थितीतही अशीच लक्षणं दिसू शकतात. परंतु, ही लक्षणं हृदयाला सूज येण्याची लक्षणं असू शकतात. त्याकडे दुर्लक्ष करण्याऐवजी तुम्ही ताबडतोब डॉक्टरांचा सल्ला घ्यावा.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत