'ठरलं तर मग' मालिका सध्या रंजक वळणावर सुरू आहे. एकाच वेळी मालिकेत अनेक गोष्टी घडताना दिसत आहे. अलिकडेच अर्जुनला अस्मिताच्या नवऱ्याचे अफेअर समजले आहे. अर्जुनने अस्मिताच्या नवऱ्याला आणि साक्षीला रोमान्स करताना रंगेहाथ पकडतो. अस्मिताचा नवरा सचिन हा साक्षीला डेट करत आहे. अस्मिताला वारंवार फसवत आहे.अस्मिता लवकरच सचिनच्या बाळाची आई होणार आहे. अशात आता सुभेदारांच्या घरात मोठे वादळ आले आहे.

सचिन आणि साक्षीचे अफेअर अखेर अस्मिताला समजले आहे. संपूर्ण सुभेदार कुटुंब सचिनच्या विरोधात पाहायला मिळत आहे. याचा खास प्रोमो नुकताच समोर आला आहे. आपल्या बहिणीचे आयुष्य खराब करणारी ही साक्षी शिखरे आहे, हे अद्याप अर्जुनला माहित नाही. जेव्हा हे अर्जुनला समजेल तेव्हा सायली आणि सुभेदार कुटुंब नेमकं काय करणार, पाहणे मनोरंजक ठरणार आहे.

प्रोमोमध्ये तुम्ही पाहू शकता की, अस्मिता आणि कल्पना बाहेर गेले असताना अस्मिता सचिनला साक्षीसोबत रोमान्स करताना पाहते. ते दोघे किस करत असतात. हे पाहून अस्मिताला मोठा धक्का बसतो तिला चक्कर येते. त्यानंतर दोघी घरी येतात. अस्मिता सचिनला जाब विचारते. तेव्हा सचिन ती मुलगी ऑफिसची सहकारी असल्याचे सांगतो. हे ऐकताच अर्जुन त्याच्या थोबाडीत मारतो. त्यानंतर अर्जुन सर्वांना सांगतो की, सचिनच्या अफेअरबद्दल मला आधीच माहित होते.

सुभेदारांच्या घरात टेन्शन सुरू असताना तेवढ्यात पूर्णा आजी तेथे येते आणि अर्जुनला सचिनला मारण्यापासून थांबवते. आता पूर्णा आजी सचिनला कोणती शिक्षा करणार? अस्मिता-सचिनच्या नात्याचे काय होणार? हे सर्व पाहणे महत्त्वाचे ठरणार आहे. पूर्णा आजीच्या येण्याने मालिकेला आता नवीन वळण आले आहे. त्यामुळे प्रेक्षक देखील मालिका पाहण्यासाठी खूपच उत्सुक आहेत. 'ठरलं तर मग' मालिका स्टार प्रवाह वाहिनीवर संध्याकाळी 8.30 वाजता पाहायला मिळते.