Salman Khan Firing Case

बॉलिवूड अभिनेता सलमान खानच्या घरावर १४ एप्रिलला पहाटे गोळीबार करण्यात आला होता. या गोळीबाराच्या घटनेमध्ये सतत वेगवेगळी माहिती समोर येत असल्याचे पाहायला मिळत आहे. या प्रकरणी मुंबई पोलिसांनी विकी गुप्ता आणि सागर पाल यांच्यानंतर आणखी दोन तरुणांना ताब्यात घेतलं आहे. दोन्हीही आरोपींना गुरूवारी रात्री उशिरा मुंबई क्राईम ब्रँच मुंबईत दाखल झाले. सलमान खानच्या घराबाहेर अंदाधुंद फायरिंग करणाऱ्या विकी आणि सागरला या दोन तरूणांनी पिस्तुल उपलब्ध करुन दिल्याचा दावा मुंबई क्राईम ब्रँचने केला आहे. (Bollywood)

गुरुवारी (२५ एप्रिल) पकडलेल्या आरोपींनी मुख्य आरोपी सागर पाल आणि विक्की गुप्ता यांना ४० राऊंड गोळ्या आणि पिस्तुल दिल्याचा दावा केला जात आहे. या दोघांना पंजाबमधून मुंबई पोलिसांनी अटक केली आहे. गोळीबार करणाऱ्या आरोपींना दोन पिस्तुल आणि जिवंत काडतुसे पुरवल्याप्रकरणी सोनू चंदर (३७) आणि अनुज थापन (३२) यांना दक्षिण पंजाबमधून अटक करण्यात आली. दोघेही सामान्य व्यक्ती असून त्यांना बिष्णोई गँगकडून दोन पिस्तुल आणि ४० काडतुसे पुरवण्यात आले होते. हे दोघेही मार्च महिन्यामध्ये, विकी आणि सागरला पिस्तुले देण्यासाठी पनवेलला आले होते. (Bollywood News)

व.पो.नि. दया नायक यांच्या मार्गदर्शनाखाली करण्यात आलेल्या या कारवाईनंतर मुंबई क्राईम ब्रँच गुरूवारी रात्री उशीरा आरोपींना घेऊन मुंबईत दाखल झाले. दोन्ही आरोपींना शुक्रवारी मुख्य दंडाधिकारी न्यायालयात हजर केले जाणार आहे. दोन्ही आरोपींकडे गोळीबाराच्या घटनेवेळी एकूण ४० गोळ्या होत्या. त्यांनी फायरिंगसठी ५ गोळ्या वापरल्या होत्या. तर हल्लेखोरांकडून १७ गोळ्या पोलिस तपासात जप्त करण्यात आलेल्या आहेत. पोलिसांना अजूनही १८ गोळ्यांचा तपास लागलेला नाही, अशी माहिती क्राईम ब्रँचने कोर्टामध्ये दिली आहे. (Mumbai News)

सागर आणि विक्की हे दोन्हीही हल्लेखोर बिहारचे रहिवासी आहेत. हल्ल्याबद्दल त्यांना कुणाकडून आर्थिक मदत मिळाली, याचा तपास करणं महत्वाचं आहे. दोघांचंही भाईजानसोबत कुठलंही वैर नाही. तरीही त्या दोघांनी सलमानच्या घराबाहेर फायरिंग का केली? त्यांना कोण आणि कुठून आदेश देत होतं? हे तपासामध्ये लवकरच समोर येईल. (Entertainment News)