लखनौ : माकडांना हुसकावण्यासाठी बापाने कुऱ्हाड फेकून मारली, पण दुर्दैवाने ती त्याच्याच मुलाच्या मानेवर बसली. या दुर्दैवी घटनेत दीड वर्षांचा मुलगा आरव याचा मृत्यू झाला. उत्तर प्रदेशमधील मोरादाबाद येथे हा प्रकार घडला. कुटुंबाने पोलिसांना माहिती न देता मुलाचं दफनविधी केलं. त्यामुळे हे प्रकरण संशयास्पद असल्याची चर्चा आहे. लखन सिंह असं पित्याचं नाव आहे, तर त्याच्या मेहुण्याने म्हणजेच आरवचा मामा जितेंद्र सिंह यांनी ही हत्या असल्याचा आरोप केला आहे. पोलिसांनी या घटनेला केवळ अपघात मानलं आहे, पण या घटनेमुळे अनेक प्रश्न उभे राहिले आहेत.

नेमकं काय घडलं?

दोन वर्षांचा आरव घरात खेळत असताना ही दुर्घटना घडली. काही माकडे घरात घुसली, यावेळी वडील लखन सिंह याला वाटलं की माकडे लहानग्या आरववर हल्ला करतील. त्यामुळे तो त्यांना हाकलण्यासाठी घराच्या छतावर गेला. त्याने माकडांना मारण्यासाठी लांबूनच कुऱ्हाड फेकली. दुर्दैवाने ती कुऱ्हाड आरवच्याच मानेवर बसली.

घटनेनंतर शौचालयाच्या भिंतीवर रक्ताचे डाग दिसले. आरवचा किंचाळण्याचा आवाज ऐकून कुटुंबीय घटनास्थळी धावले. त्यांनी त्याला तातडीने जवळच्या हॉस्पिटलमध्ये नेलं. डॉक्टरांनी त्याला मृत घोषित केलं, असं अधिकाऱ्यांनी सांगितलं. यानंतर, कुटुंबाने पोलिसांना माहिती न देता मुलाला दफन केलं. त्यामुळे नातेवाईकांमध्ये संशय निर्माण झाला.

लखन सिंहचा मेहुणा जितेंद्र सिंह याने आरोप केला की हा अपघात नसून हत्या आहे. त्याच्या म्हणण्यानुसार, लखनने पत्नी अनितासोबत झालेल्या भांडणात मुलाला मारलं. जितेंद्रने सांगितले, 'लखनचे अनितासोबत सोमवारी रात्री भांडण झालं. त्याने तिला खोलीत कोंडून मारलं. रात्री वाद शांत झाला, पण मंगळवारी सकाळी तो पुन्हा सुरू झाला. जेव्हा पती-पत्नी भांडत होते, तेव्हा आरव त्याचे आजोबा रामचंद्र यांच्या मांडीवर होता. भांडणादरम्यान, लखनने आरवला हिसकावून घेतले, कुऱ्हाड उचलली आणि त्याला मारलं.'