संजय महाजन, जळगाव प्रतिनिधी, साम टीव्ही

दोन जणांनी २६ वर्षाच्या मित्राची निर्घृण हत्या केली. त्याच्या मृतदेहाचे तुकडे पोत्यात भरले अन् जंगलातील तलावात टाकल्याची धक्कादायक घटना जळगावमध्ये घडली आहे. निलेश राजेंद्र कासार असे मृत झालेल्या २६ वर्षाच्या तरूणाचे नाव आहे. भूषण बाळू पाटील आणि दिनेश चौधरी अशी आरोपींची नावे आहेत. पोलिसांनी आरोपींना बेड्या ठोकल्या असून चौकशी सुरू आहे. दिनेश आणि भूषण यांनी निलेश याचा खून का केला? याबाबत अद्याप माहिती समोर आलेली नाही.

निलेश चौधरी हा जामनेरजवळ राहायला आहे. तो आणि भूषण आणि दिनेश हे आरोपी एका फायनान्स कंपनीत कामाला होते. निलेश मागील तीन ते चार दिवसांपासून बेपत्ता होता. त्याचा मृतदेह जंगलातील तलावात आढळला आहे. पोलिसांनी मृतदेह ताब्यात घेऊन तत्काळ पोस्टमार्टमसाठी पाठवला अन् चौकशीची चक्रे फिरवली. त्यांनी काही दिवसात आरोपींना बेड्या ठोकल्या. पोलिसांची खाकी पाहाताच आरोपींनी गुन्ह्याची कबुली दिली आहे. पण अद्याप खून का केला? हे समोर आलेले नाही.

निलेश याची हत्या केल्यानंतर त्याचा मृतदेह पोत्यात बांधून जळगाव तालुक्यातील शिरसोली गावापासून चार ते पाच किलोमीटर अंतरावर असलेल्या जंगलात तलावात फेकून दिला होता. दोन्ही आरोपी हे निलेश याचे मित्र असल्याची माहिती समोर आली आहे. तिघेही एकाच कंपनीत कामाला होते. पण तिघांचे कुठे फिसकटले? याची चर्चा जामनेर अन् परिसरात सुरू आहे. पोलिसांनी मृतदेह पोस्टमार्टमसाठी सरकारी रूग्णालयात पाठवलाय.

पोलिसांनी तपासाची सूत्रे हालवल्यानंतर भूषण बाळू पाटील आणि दिनेश चौधरी यांच्यावर संशयाची सुई आली. त्यांनी त्यांचे लोकेशन स्ट्रेस केले. त्यानंतर सूरतमधून दोन्ही आरोपींच्या मुसक्या आवळल्या. जामनेरमध्ये आणल्यानंतर पोलिसांनी आरोपींना खाकीचा हिसका दाखवला अन् जाब विचारला. आरोपींनी गुन्ह्याची कबुली दिली आहे. तरुणाची हत्या करण्यामागचं कारण अद्याप समोर आलेलं नाही. पोलीस तपास करत आहेत. मयत निलेश आणि संशयित आरोपी हे तिघे एकाच फायनान्स कंपनीत कामाला होते. ते चांगले मित्र असल्याची माहिती पोलिसांच्या तपासात समोर आली आहे.