Manu- Neeraj: मनू आणि नीरज लवकरच लग्नबंधनात अडकणार? व्हायरल मेसेजमागचं सत्य काय?

पॅरिस ऑलिम्पिकमध्ये भारताची नेमबाज मनू भाकर आणि नीरज चोप्रानं मेडल जिंकत तमाम भारतीयांची मनं जिंकली. या दोघांनी ऑलिम्पिकचं मैदान तर मारलं मात्र आता ही जोडगोळी आयुष्याची नवी इनिंग खेळण्यासाठी सज्ज असल्याचा मेसेज सोशल मीडियात व्हायरल होतोय. सोशल मीडियात काही व्हिडीओ व्हायरल करत मनू आणि नीरजच्या लग्नाचा दावा केला जातो..

हा व्हिडीओ पाहा, यात मनू भाकर आणि नीरज चोप्रा एकमेकांशी बोलताना दिसतायेत. या व्हिडीओवरूनच चर्चांचा बाजार गरम झालाय. आता हा दुसरा व्हिडीओ पाहा..यातमनू भाकरची आई सुमेधा भाकर आणि ऑलिम्पिक पदक विजेता नीरज चोप्रा दिसतोय. या व्हिडीओत सुमेधा भाकर नीरजचा हात पकडून आपल्या डोक्यावर ठेवतात. या दोन्ही व्हिडीओवरूनच सोशल मीडियात दोघांच्या लग्नाचा दावा केला जातोय.

मनू भाकर आणि नीरज चोप्रा हे युवापिढीचे आयकॉन आहेत. ऑलिम्पिक मेडल जिंकून देत दोघांनीही देशाचा नावलौकिक वाढवलाय. त्यामुळे व्हायरल होत असलेला मेसेज खरा आहे? मनू आणि नीरज लग्नाच्या बेडीत अडकणार आहेत का? साम टीव्हीनं यामागचं सत्य शोधण्याचा प्रयत्न केला. तेव्हा काय सत्य समोर आलं पाहा.

मनू भाकर आणि नीरज चोप्रा दोघांच्याही कुटुंबियांनी माध्यमांशी बोलताना लग्नाचा दावा फेटाळून लावलाय. नीरजचे काका सुरेंद्र चोप्रा यांनी नीरजचा साखरपुडा झाल्याचं सांगितलंय. तर मनू भाकरचे वडील राम किशन भाकर यांनीही व्हायरल व्हिडीओवरून नाराजी व्यक्त केलीय. एक आई आपल्या मुलासोबत बोलू शकत नाही का? असा सवाल करत दोघांच्या लग्नाची अफवा असल्याचं त्यांनी सांगितलं. मनूच्या लग्नाचं वय नसून करिअरवरच तिचा फोकस असल्याचं त्यांनी स्पष्ट केलं.

त्यामुळे आमच्या पडताळणीत नेमबाज मनू भाकर आणि नीरज चोप्रा लग्नबंधनात अडकणार असल्याचा दावा असत्य ठरलाय. दोघेही चांगले मित्र आहेत. मात्र त्यांचे व्हिडीओ व्हायरल करून लग्नाच्या अफवा पसरवल्या जात आहेत. तुम्ही अशा व्हिडीओवर आणि मेसेजेसवर विश्वास ठेऊ नका.