MVA CM Face: मविआचा मुख्यमंत्री कोण? संजय राऊतांकडून वेळ, तारीख जाहीर

विधानसभा निवडणुकीच्या तोंडावर महाविकास आघाडीत मुख्यमंत्री पदावरुन बरीच रस्सीखेच रंगल्याचं पाहायला मिळालं..त्यावरुन महाविकास आघाडीत मुख्यमंत्रिपदावरून कोणताही वाद नाही आणि याचा निर्णय निवडणुकीनंतर घेतला जाईल असं देखील सांगितलं गेलं. मात्र सातत्यानं शिवसेना ठाकरे गटाचे प्रवक्ते आणि खासदार संजय राऊत मुख्यमंत्रीपदाबाबत भाष्य केलं. आता पुन्हा संजय राऊतांनी मुख्यमंत्री कोण होणार हे मी सांगणार असल्याचं म्हटलंय..त्यामुळे अनेकांच्या भुवया उंचावल्यात....

मविआ सरकार स्थापनेवेळी मुख्यमंत्री होण्यास इच्छुक नव्हतो असा दावा उद्धव ठाकरेंनी केला होता..शरद पवारही याला दुजोरा देतात आणि आपल्या आग्रहामुळेच उद्धव ठाकरे मुख्यमंत्री झाल्याचंही सांगतात. विधानसभा निवडणुकीत उद्धव ठाकरेंना मविआचा मुख्यमंत्रिपदाचा उमेदवार जाहीर करण्यासाठी ठाकरे गटालाच सर्वाधिक घाई झालीये हे वेळोवेळी पाहायला मिळालंय..त्यात आता संजय राऊतांनी पुन्हा मुख्यमंत्रीपदाबाबत भाष्य करताना तारीख,वेळ जाहीर केलीये. त्यामुळे मुख्यमंत्री ठाकरेच होणार असा सुप्त इशारा राऊत देतायत का? आणि मविआतील इतर दोन पक्ष यासाठी तयार होणार का ? की यावरुन मविआत बिघाडीत होणार याची उत्तर 23 नोव्हेंबरलाच मिळतील.