TCS Case Nida Khan : धर्मांतरण, महिलांच्या लैंगिक शोषणातील आरोपी निदा खानला कोठडी

अभिजीत सोनवणे, नाशिक | साम टीव्ही

राज्यात खळबळ उडवून देणाऱ्या टीसीएस धर्मांतरण आणि महिला कर्मचाऱ्यांच्या लैंगिक शोषण प्रकरणातील आरोपी निदा खान हिला अटक केल्यानंतर तिला आज, सोमवारी न्यायालयात हजर करण्यात आले. न्यायालयाने तिला १४ दिवसांची न्यायालयीन कोठडी सुनावली आहे. पोलिसांनी निदाचा मोबाइल फॉरेन्सिक तपासणीसाठी पाठवला आहे. तिच्या कुटुंबीयांचीही चौकशी करण्यात येत आहे. त्यामुळे या प्रकरणाच्या तपासाची व्याप्ती आणखी वाढणार आहे.

निदा खान हिला अटक केल्यानंतर तिला चार दिवसांची पोलीस कोठडी देण्यात आली होती. तिची कोठडीची मुदत संपल्यानंतर आज, सोमवारी पुन्हा तिला नाशिकच्या न्यायालयात हजर करण्यात आले. यासाठी न्यायालयाच्या परिसरात पोलीस बंदोबस्त ठेवण्यात आला होता. न्यायालयाने तिला १४ दिवसांची न्यायालयीन कोठडी सुनावली आहे.