Santosh Deshmukh Case : संतोष देशमुख हत्या प्रकरणी मोठी अपडेट; सीआयडीला सापडला मोठा पुरावा,VIDEO

बीड : बीडमधील सरपंच संतोष देशमुख हत्या प्रकरणी मोठी अपडेट हाती आली आहे. संतोष देशमुख यांच्या हत्येचा व्हिडिओ सीआयडी विभागाच्या अधिकाऱ्यांच्या हाती लागल्याची माहिती सूत्रांनी दिली आहे. मात्र, अधिकाऱ्यांकडून या व्हिडिओला अधिकृत दुजोरा मिळाला नाही.

बीडच्या मसाजोग येथील सरपंच संतोष देशमुख हत्या प्रकरणात अपहरणादरम्यान वापरण्यात आलेली काळ्या रंगाची गाडी पोलिसांनी दुसऱ्या दिवशी जप्त केली होती.. याच कारमध्ये पोलिसांना दोन मोबाईल आढळले. या मोबाईलमध्ये सरपंच संतोष देशमुख यांना मारहाण करतानाचा व्हिडिओ चित्रित करण्यात आल्याची चर्चा होती. तर याच मोबाईलवरून एका नेत्याला फोन देखील केल्याची माहिती पुढे येत आहे. मागील ४ दिवसांपासून सीआयडीचे पथक बीडमध्ये तळ ठोकून आहे. सध्या या प्रकरणाचा तपास सीआयडी करत आहे. तर सीआयडीचे विशेष पथक बीड शहर पोलीस ठाण्यामध्ये दाखल आहे. उपलब्ध माहितीच्या आधारे सीआयडीचा सध्या तपास सुरू आहे.