Railway Accident: रुळावरून मालगाडी घसरलेचा|VIDEO

भुसावळकडून नंदुरबारकडे जाणारी मालगाडी आज दुपारी सुमारे दोन वाजेच्या सुमारास अमळनेरजवळ रुळावरून घसरली. या घटनेमुळे सुरत-भुसावळ रेल्वेमार्गावरील वाहतूक पूर्णतः ठप्प झाली असून, रेल्वे प्रशासनाने तातडीने दुरुस्तीचे काम सुरू केले आहे.

सुदैवाने या दुर्घटनेत कोणतीही जीवितहानी झाली नाही. लोको पायलट आणि गार्ड सुरक्षित आहेत. मात्र मालगाडीचे काही डबे रुळाखाली गेल्याने आसपासचे ट्रॅकही खराब झाले आहेत, त्यामुळे सूरत भुसावळ हा रेल्वेमार्ग बंद करण्यात आला आहे.

घटना स्टेशनपासून थोड्याच अंतरावर घडल्याने अधिकाऱ्यांनी तात्काळ घटनास्थळी धाव घेऊन मदत आणि दुरुस्ती कार्य सुरू केले आहे. हा अपघात घडल्यानंतर बघणाऱ्यांनी मोठी गर्दी केली होती. रेल्वे अधिकाऱ्यांनी अपघाताबाबत अधिक माहिती देण्यास नकार दिला असून, नेमकी दुर्घटना कशी घडली याबाबत तपास सुरू असल्याचे सांगण्यात आले.