IPL 2026: IPL सुरू होण्याआधी दारू सोडली, दिग्गज खेळाडूनं एबीसमोर सांगितलं कारण

आयपीएल 2026 सुरू होण्यापूर्वी टीम इंडियाचा स्पिनर युजवेंद्र चहल याने त्याच्या पर्सनल लाईबाबत एक मोठा खुलासा केलाय. यंदाच्या आयपीएल सिझनमध्ये तो पंजाब किंग्सकडून खेळणार आहे. अशातच लीग सुरू होण्यापूर्वी चहल स्वतःच्या फिटनेसवर खास लक्ष देताना दिसतोय.

आंतरराष्ट्रीय क्रिकेटमध्ये कमबॅक करण्यासाठी मेहनत करत असलेल्या चहलने एबी डिविलियर्सच्या यूट्यूब शोमध्ये सांगितलं की, त्याने दारू पूर्णपणे सोडण्याचा निर्णय घेतला आहे. गेल्या सहा महिन्यांपासून त्याने दारूला हात लावलेला नाही. हे ऐकून डिविलियर्सनेही त्याचं कौतुक केलंय.

फिटनेस टिकवणं चहलसमोर मोठं आव्हान

३५ वर्षांचा झाल्यानंतर फिटनेस टिकवणं हे चहलसाठी मोठं आव्हान बनलं होतं. यासाठी तो प्रचंड मेहनत घेत होता. याबाबत बोलताना तो म्हणाला, “मी दारू पिणं सोडलं आहे. सहा महिन्यांहून अधिक काळ झाला, मी दारूला स्पर्शही केलेला नाही. आता वय वाढत असल्यामुळे शरीराची अधिक काळजी घ्यावी लागते. मला माझ्या टीमसाठी १५० टक्के योगदान द्यायचंय. मी सिनीयर खेळाडू असल्यामुळे तरुणांनी माझ्याकडून काहीतरी शिकावं, ही माझी इच्छा आहे.”

गेल्या सिझनमध्ये अंतिम सामन्याबद्दलही चहलने त्याचं मत व्यक्त केलं. त्याने सांगितलं की, मार्को यानसेन टीममध्ये नसल्याचा मोठा फटका बसला. फायनलच्या आधी यानसेन आपल्या देशात परतला होता कारण त्याला आयसीसी वर्ल्ड टेस्ट चॅम्पियनशिपसाठी तयारी करायची होती.

पंजाब किंग्स संघ गेल्या वर्षी पहिल्यांदाच आयपीएल ट्रॉफीच्या अगदी जवळ पोहोचला होता, पण अंतिम सामन्यात रॉयल चॅलेंजर्स बेंगळुरू कडून ६ रन्सने पराभव पत्करावा लागला. चहलच्या मते, “जर यानसेन टीममध्या असता तर आम्ही नक्कीच जिंकलो असतो. त्याची गोलंदाजी आणि आक्रमक फलंदाजी टीमसाठी खूप महत्त्वाची होती.”

चहलने आणखी एक महत्त्वाचा खुलासा केला. त्याने सांगितलं की, गेल्या सिझनच्या शेवटी तो दुखापतींशी झुंजत होता. कोलकाता नाईट रायडर्स विरुद्धच्या सामन्यानंतर त्याच्या बरगड्यांना फ्रॅक्चर झालं होतं. त्यानंतर त्याच्या हाताच्या बोटालाही दुखापत झाली.

या कारणामुळे तो सेमीफानयल आणि अंतिम सामन्यात तो लेग-स्पिनने गोलंदाजी करू शकला नाही. आता मात्र चहलने ठरवलंय की फिटनेसलाच प्राधान्य देत पंजाब किंग्सला पहिलं आयपीएल विजेतेपद मिळवून देण्यासाठी प्रयत्न करणार आहे, असंही त्याने नमूद केलंय.