U19 World Cup 2024: अंडर १९ विश्वचषकात भारताचा करिष्मा, २१४ धावांच्या फरकाने न्यूझीलंडला धूळ चारली

India vs New Zealand:

अंडर १९ विश्वचषक स्पर्धेतील सलग चौथ्या सामन्यात भारताचा करिष्मा पाहायला मिळत आहे. आयसीसीने आयोजित केलेल्या अंडर-१९ विश्वचषकाची सुपर ६ फेरी सुरु झाली आहे. सुपर ६ फेरीच्या पहिल्या सामन्यात टीम इंडियाने न्यूझीलंडला २१४ धावांच्या फरकाने धूळ चारली आहे. न्यूझीलंडचा पराभव करत टीम इंडियाने विश्वचषक जिंकण्यासाठी यशस्वी वाटचाल सुरु केली आहे. (Latest Marathi News)

न्यूझीलंडच्या फलंदाजांची पडझड

नाणेफेक हरल्यानंतर प्रथम फलंदाजीसाठी उतरलेल्या टीम इंडियाने दिलेल्या २९६ धावांचा पाठलाग करताना न्यूझीलंड संघाची सुरुवात खराब झाली. न्यूझीलंडचा संघ अवघ्या ८१ धावांवर गारद झाला. न्यूझीलंडकडून कर्णधार ऑस्कर जॅक्सनने सर्वाधिक १९ धावा केल्या. तर जॅक कमिंगने १६ धावा केल्या. जेम्सने १० धावा ठोकल्या. न्यूझीलंडचे ६ खेळाडू दहाचा आकडाही गाठू शकले नाहीत. भारतासाठी सौम्या पांडेने सर्वाधिक गडी बाद केले.

टीम इंडियाची दमदार फलंदाजी

टीम इंडियासाठी राज लिबांनी आणि मुशीर खानने दोन-दोन गडी बाद केले आहे. तर फलंदाजी करताना टीम इंडियाच्या फलंदाजांनी जलवा दाखवला. टीम इंडियाने ५० षटकात न्यूझीलंडला जिंकण्यासाठी २९६ धावांचा आव्हान दिलं होतं. भारताने नाणेफेक हरल्यानंतर ५० षटकात ८ गडी गमावून २९५ धावा केल्या होत्या. या डावात मुशीर खानने दमदार शतकी खेळी खेळली.

मुशीरचं दमदार शतक

मुशीरने १२६ चेंडूत १३ चौकार आणि ३ षटकाराच्या जोरावर १३१ धावा ठोकल्या. तर सलामीवर आदर्श सिंहने ५२ धावा ठोकल्या. कर्णधार उदय सहारनने ३४ धावा ठोकल्या. अरवेल्ली अविनाशने १७ , सचिन दासने १५ धावांचं योगदान दिलं. अर्शिन कुलकर्णीने ९ धावा केल्या. तर न्यूझीलंडसाठी मेसन क्लार्कने सर्वाधिक ४ गडी बाद केले.