Celebrities on Vinesh Phogat : विनेश फोगाटला अपात्र ठरवल्याने सेलिब्रिटी दुखावले; स्टार्स म्हणाले, हे तर षडयंत्र!

मुंबई : पॅरिस ऑलिम्पिकमध्ये सुवर्णपदकाची प्रबळ दावेदार मानली जाणारी भारताची स्टार कुस्तीपटू विनेश फोगाट हिला केवळ 100 ग्रॅम वजनामुळे अपात्र घोषित करण्यात आले. विनेश फोगाट संदर्भातली ही बातमी समोर आल्यानंतर देशातील प्रत्येक नागरिकांचे ह्रदय तुटले. उपांत्य फेरीत शानदार विजय मिळवल्यानंतर 'दंगल गर्ल' आश्चर्यकारक कामगिरी करेल, असा विश्वास भारतीयांना होता. पण सर्व आशा धुळीस मिळाल्या. या घोषणेनंतर विनेशला जितक्या वेदना होत असतील, तितक्याच प्रत्येक भारतीयासह बॉलीवूड स्टार्सनाही होत आहेत. या घटनेवर हार्टब्रेक झालेले सेलिब्रिटी तीव्र प्रतिक्रिया देत आहेत.

6 ऑगस्टला एकापाठोपाठ एक तीन सामने जिंकून विनेश फोगाटने इतिहास रचला आणि अंतिम फेरीत धडक मारली. 50 किलो फ्रीस्टाइल स्पर्धेच्या उपांत्य फेरीत क्युबाच्या कुस्तीपटूचा पराभव केला. पण 100 ग्रॅम वजन जास्त असल्याचे कारण देत तिला खेळापूर्वी अपात्र घोषित करण्यात आले. स्वरा भास्कर, तापसी पन्नू, फरहान अख्तरपासून ते सोनाक्षी सिन्हा यांनी या प्रकरणावर प्रतिक्रिया दिल्या आहेत.

आयओसीच्या या निर्णयामुळे ‘हिरामंडी’ स्टार सोनाक्षीला धक्का बसला आहे. सोशल मीडियावर पोस्ट शेअर करताना तिने लिहिले, 'विश्वास बसत नाही. तुला आता कसं वाटत असेल, याची मी कल्पनाही करू शकत नाही. काय बोलावे कळेना. फक्त तू होतीस, आहेस आणि नेहमीच चॅम्पियन राहशील'.

सोनाक्षी पाठोपाठ अभिनेत्री तापसी पन्नूने लिहिले की, "आणखी एक षडयंत्र? हा फक्त योगायोग आहे का? 100 ग्रॅमचे सिद्धांत काय? हे आमचे क्रीडा धोरण आहे का?"

पुढे स्वरा भास्करने देखील यावर नाराजी व्यक्त केली आहे. 'या 100 आणि ओव्हरवेट कथेवर कोण विश्वास ठेवतो?' या पोस्टसोबत तिने एक तुटलेली लाल हार्ट इमोजीही शेअर केली आहे.

'भाग मिल्खा भाग' या चित्रपटातील अभिनेता आणि चित्रपट निर्माता फरहान अख्तरही विनेश फोगाटला सपोर्ट करताना दिसला. कुस्तीपटूचे मनोबल वाढवत फरहानने लिहिले, 'प्रिय विनेश फोगाट... तुम्ही यावेळी किती निराश असाल याची कल्पनाच करता येईल. हे सर्व अशा प्रकारे संपले यामुळे तुमच्यासाठी मन दुखावले गेले आहे. पण कृपया हे तु्म्ही जाणून घ्या की आम्हा सर्वांना तुमचा आणि तुम्ही खेळासाठी केलेल्या सर्व प्रयत्नांचा खूप अभिमान आहे. तुम्ही नेहमीच चॅम्पियन आणि लाखो लोकांसाठी प्रेरणास्थान असाल. हिम्मत ठेवा.

बॉलिवूड अभिनेत्री सोफी चौधरीही या बातमीने खूप दु:खी आहे. ती म्हणाली, 'मी खूप दुःखी आहे आणि खूप रागावली आहे. हे अत्यंत चुकीचे आहे. 0.1 किलो??? विनेशला कसे वाटले असेल याची मी कल्पनाही करू शकत नाही'. या स्टार्सशिवाय इतरही अनेकांनी विनेश फोगाटच्या समर्थनार्थ प्रतिक्रिया देत याला षडयंत्र म्हटले आहे आणि या संदर्भात चौकशी व्हावी अशी अनेकांची इच्छा आहे.