Sarfaraz Khan: 'जल्लोषाची तयारी करा..' सरफराजची टीम इंडियात निवड होताच सूर्यकुमार यादवची खास पोस्ट

Suryakumar Yadav Instagram Story For Sarfaraz Khan:

इंग्लंडविरुद्ध होणाऱ्या दुसऱ्या कसोटी सामन्यासाठी भारतीय संघात काही मोठे बदल करण्यात आले आहेत. मालिकेतील दुसरा सामना २ फेब्रुवारीपासून विशाखापट्टनममध्ये रंगणार आहे. दरम्यान या सामन्यातून केएल राहुल आणि रविंद्र जडेजा बाहेर झाला आहे.

त्यांच्याऐवजी वॉशिंग्टन सुंदर, सौरभ कुमार आणि सरफराज खानला संधी दिली गेली आहे. दरम्यान सरफराज खानची निवड होताच भारताचा स्टार क्रिकेटपटू सूर्यकुमार यादवने एक खास पोस्ट शेअर करत त्याचं अभिनंदन केलं आहे. (Suryakumar Yadav Instagram Story)

गेल्या काही वर्षांपासून रणजी ट्रॉफी स्पर्धेत सरफराज खानचा बोलबाला पाहायला मिळाला आहे. त्याने धावांचा पाऊस पाडत सिलेक्टर्सचं लक्ष वेधून घेण्याचा पुरेपूर प्रयत्न केला. मात्र त्याला संधी दिली जात नव्हती. अखेर त्याची कसोटी संघात निवड झाली आहे. दरम्यान निवड होताच सूर्यकुमार यादवला प्रचंड आनंद झाला आहे. त्याने स्टोरी शेअर करत आपला आनंद व्यक्त केला आहे. त्याची इंस्टाग्राम स्टोरी सध्या तुफान चर्चेत आहे. (Latest sports updates)

सूर्यकुमार यादवने स्टोरी शेअर करत त्याचं कौतुक केलं आहे. त्याने सरफराज खानसोबतचा (Sarfaraz Khan) फोटो शेअर केला आहे. ज्यावर त्याने कॅप्शन म्हणून ' मला खूप आनंद झाला आहे. भारतीय संघात निवड झालीये.. जल्लोष साजरा करायची तयारी करा.. '

रणजी क्रिकेटमध्ये दमदार खेळ...

सरफराज खानने गेल्या ४ वर्षात दमदार खेळ करून दाखवला आहे. त्याने २०२२-२३ हंगामातील ६ सामन्यांमध्ये ९२.६६ च्या सरासरीने ५५६ धावा केल्या आहेत. तर २०२१-२२ च्या रणजी हंगामात त्याने १२२.७५ च्या सरासरीने धावा केल्या.

यापूर्वी २९१९-२० मध्ये झालेल्या हंगामात त्याने १५४.६६ च्या सरासरीने धावा केल्या होत्या. त्याची ही दमदार कामगिरी पाहता त्याला भारतीय संघात स्थान देण्याची मागणी जोर धरू लागली होती. अखेर त्याला संधी मिळाली आहे.

इंग्लंडविरुद्धच्या दुसऱ्या कसोटीसाठी असा आहे भारतीय संघ :

रोहित शर्मा (कर्णधार), शुभमन गिल, यशस्वी जयस्वाल, श्रेयस अय्यर, केएस भरत (यष्टिरक्षक), ध्रुव जुरेल (यष्टिरक्षक), आर अश्विन, अक्षर पटेल, कुलदीप यादव, मोहम्मद सिराज, मुकेश कुमार, जसप्रीत बुमराह (कर्णधार), आवेश खान, रजत पाटीदार, सरफराज खान, वाशिंगटन सुंदर आणि सौरभ कुमार.