Shreyas Iyer : श्रेयस अय्यर होणार टीम इंडियाचा कर्णधार? BCCI चा नवीन प्लॅन, वर्ल्ड कपआधी होणार घोषणा

Shreyas Iyer to Become Team India’s Next ODI Captain? भारतीय क्रिकेट संघाचा वनडेचा कर्णधार रोहित शर्माच्या निवृत्तीच्या चर्चांना गेल्या काही दिवसांपासून वेग आलाय. टी-20 आणि कसोटी क्रिकेटमधून निवृत्ती घेतल्यानंतर रोहित आता फक्त वनडे क्रिकेट खेळत आहे. पण बीसीसीआय आणि निवड समितीकडून रोहित शर्माला वनडे संघातही संधी देईल की नाही, याबाबत याबाबत अनिश्चितता आहे. रोहित शर्माचा २०२७ च्या वनडे विश्वचषकापर्यंत खेळण्याचा विचार आहे, त्याने बोलूनही दाखवलेय. पण बीसीसीआयच्या मनात वेगळेच काहीतरी शिजतेय. दरम्यान, भारतीय वनडे संघाच्या कर्णधारपदासाठी श्रेयस अय्यरच्या नावाची जोरदार चर्चा सुरू आहे.

श्रेयस अय्यरकडे वनडे कर्णधारपद ?

सूत्रांच्या माहितीनुसार, बीसीसीआय श्रेयस अय्यरला वनडे संघाचा कर्णधार बनवण्याचा विचार करत आहे. त्याआधी आशिया चषकासाठी शुभमन गिलला उपकर्णधारपद देऊन भविष्यातील कर्णधार म्हणून तयार करण्याचे संकेत दिले होते. मात्र आता वनडे संघासाठी अय्यर हा वेगळा पर्याय समोर येत आहे. रोहित शर्माच्या निवृत्तीच्या निर्णयानंतरच अय्यरला कर्णधारपद मिळण्याची शक्यता वर्तवण्यात येत आहे. जर रोहितने निवृत्ती घेतली, तर ऑस्ट्रेलिया दौऱ्यापासूनच अय्यर कर्णधारपद सांभाळू शकतो.

शुभमन गिलकडे वनडेचे कर्णधारपद का नाही?

शुभमन गिल याला तिन्ही प्रकारचा कर्णधार बनवण्याची योजना बीसीसीआयने तूर्तास बाजूला ठेवल्याचे समजतेय. शुभमन गिल याच्यावर आधीच कसोटी संघाची मोठी जबाबदारी आहे. त्यामुळे त्याच्यावर अतिरिक्त दडपण टाकण्याचे बोर्ड टाळत आहे. दैनिक जागरणच्या वृत्तानुसार, बीसीसीआय श्रेयस अय्यरला २०२७ च्या विश्वचषकापर्यंत वनडे संघाचा कर्णधार बनवण्याचा विचार करत आहे. अद्याप याबाबत अधिकृत निर्णय झालेला नाही.

आशिया चषकातून डावलले

आशिया कपसाठी टी-20 संघात श्रेयसला स्थान मिळाले नाही. त्यामळे सोशल मीडियावरस नाराजी व्यक्त करण्यात येत आहे. यंदाच्या चॅम्पियन्स ट्रॉफीत त्याने शानदार कामगिरी करत सर्वांचे लक्ष वेधले होते. चॅम्पियन्स ट्रॉफीमध्ये अय्यरने ५ सामन्यांत २४३ धावा केल्या होत्या. अय्यरने आतापर्यंत ७० वनडे सामन्यांत ४८ च्या सरासरीने २८४५ धावा केल्या आहेत. त्यामध्ये पाच शतकांचा समावेश आहे.