Rohit Sharma Record: हिटमॅनचा नाद करायचा नाय! 1 रन करताच मोडला मोठा रेकॉर्ड; सचिनलाही सोडलं मागे

भारताचा कर्णधार आणि सलामीवीर फलंदाज रोहित शर्माने आणखी एक मोठा रेकॉर्ड आपल्या नावावर केला आहे. क्रिकेट कारकिर्दीची सुरुवात केल्यानंतर रोहित शर्मा सुरुवातीला मधल्या फळीत फलंदाजीला यायचा. त्यानंतर २०१३ पासून त्याला सलामीला फलंदाजी करण्याची संधी मिळाली आणि रोहितच्या क्रिकेट कारकिर्दीला कलाटणी मिळाली. २०१३ पासून ते २०२५ पर्यंत रोहितने अनेक मोठे रेकॉर्ड मोडून काढले आहेत. दरम्यान पाकिस्तानविरुद्धच्या सामन्यात धावांचं खातं उघडताच रोहित शर्माच्या नावे मोठ्या रेकॉर्डची नोंद झाली आहे.

रोहित शर्माच्या नावे मोठ्या रेकॉर्डची नोंद

रोहित शर्माने या सामन्यात १ धाव करताच वनडे क्रिकेटमध्ये सलामीवीर फलंदाज म्हणून ९००० धावांचा पल्ला गाठला आहे. हा कारनामा त्याने १८१ व्या डावात करुन दाखवला आहे. हा रेकॉर्ड इतक्या जलद गतीने कुठल्याही फलंदाजाला करत आलेला नाही.

यापूर्वी हा रेकॉर्ड भारताचा मास्टर ब्लास्टर म्हणून ओळखल्या जाणाऱ्या सचिन तेंडुलकरच्या नावे होता. सचिनने सलामीवीर म्हणून ९००० धावांपर्यंतचा पोहोचण्याचा पल्ला १९७ व्या डावात गाठला होता. आता रोहितने हा रेकॉर्ड आपल्या नावावर केला आहे.

या दिग्गज फलंदाजांना सोडलं मागे

रोहितने या मोठ्या रेकॉर्डमध्ये सचिन तेंडुलकरसह आणखी काही दिग्गज फलंदाजांना मागे सोडलं आहे. ज्यात अॅडम गिलख्रिस्ट, सौरव गांगुली आणि सनथ जयसूर्यासारख्या फलंदाजांचा समावेश आहे. यापूर्वी हा मोठा रेकॉर्ड सचिन तेंडुलकरच्या नावे होता. तर सौरव गांगुलीने हा कारनामा २३१ व्या डावात, ख्रिस गेलने २४६ व्या डावात आणि अॅडम गिलख्रिस्टने हा कारनामा २५३ व्या डावात करुन दाखवला आहे.

टीम इंडियाची दमदार सुरुवात

या सामन्यात भारतीय संघाला विजयासाठी २४२ धावा करायच्या होत्या. भारतीय गोलंदाजांच्या शानदार गोलंदाजीच्या बळावर पाकिस्तानचा डाव अवघ्या २४१ धावांवर आटोपला. या धावांचा पाठलाग करताना, रोहित शर्मा आणि शुभमन गिलची जोडी मैदानावर आली. या दोघांनी संघाला आक्रमक सुरुवात करुन दिली. रोहितने २० धावा चोपल्या. यादरम्यान त्याने ३ चौकार मारले आणि १ षटकार खेचले.