Rohit Sharma Statement: 'मी उद्या त्याला...', अक्षरच्या गोलंदाजीवर सोपी कॅच सोडल्यावर काय म्हणाला रोहित शर्मा?

भारत आणि बांगलादेश या दोन्ही संघांमध्ये चॅम्पियन्स ट्रॉफी स्पर्धेतील दुसरा सामना पार पडला. या सामन्यात भारताने बांगलादेशचा ६ गडी राखून धुव्वा उडवला. या सामन्यातील पहिल्या डावात फलंदाजी करताना बांगलादेशचा डाव २२८ धावांवर आटोपला होता. हे आव्हान भारतीय संघाने २१ चेंडू राखून पूर्ण केलं. यासह भारताने विजयी सुरुवात केली.

भारताची भेदक गोलंदाजी पाहता बांगलादेशला १०० धावा करण्यासाठीही नाकी नऊ आले असते. मात्र रोहित शर्माच्या एका चुकीमुळे बांगलादेशने २०० धावांचा डोंगर उभारला. बांगलादेशकडून फलंदाजी करताना जाकीर अली आणि तोहीद हृदोयने शानदार १५४ धावांची भागीदारी केली.

मात्र रोहितने जर सोपा झेल सोडला नसता तर बांगलादेशचा डाव स्वस्तात निपटला असता. यादरम्यान अक्षर पटेलला हॅट्रीक घेण्याची संधी होती. मात्र रोहितने झेल सोडल्यामुळे ही हॅट्रीक थोडक्यात हुकली. लाईव्ह सामन्यात रोहित संताप व्यक्त करताना दिसून आला. त्यानंतर त्याने माफीही मागितली.

झेल सोडल्यानंतर रोहित काय म्हणाला?

जर रोहितने जाकीर अलीचा झेल घेतला असता, तर अक्षर पटेल आयसीसी स्पर्धेत हॅट्रीक घेणारा पहिलाच भारतीय गोलंदाज ठरला असता. तर चॅम्पियन्स ट्रॉफीत असा रेकॉर्ड करणारा दुसराच गोलंदाज ठरला असता. दरम्यान सामन्यानंतरही त्याने हटके स्टाईलमध्ये अक्षरची माफी मागितली.

सामन्यानंतर बोलताना रोहित शर्मा म्हणाला, ‘ मी उद्या त्याला डिनरला घेऊन जाऊ शकतो. तो एक सोपा झेल होता. मी स्लिपमध्ये क्षेत्ररक्षण करताना जो स्टँडर्ड सेट केलाय ते पाहता मी तो झेल पकडायला हवा होता.’

तर हॅट्रीकबद्दल बोलताना अक्षर पटेल म्हणाला ,‘ खूप काही झाला, पण मला माहीत नव्हतं की तो आऊट आहे. केएल राहुलने अपील केली आणि तो आऊट झाला. त्यानंतर मला दुसरा विकेट मिळाला. तिसऱ्या चेंडूवर चेंडू बॅटची कडा घेऊन स्लिपमध्ये गेला, मी जल्लोष करायला सुरुवात केली. मात्र त्यानंतर मी पाहिलं झेल सुटलाय, चूक सर्वांकडून होऊ शकते.‘