Ind Vs Eng : प्रसिद्ध क्रिकेटपटूचे निधन, भारत-इंग्लंड सामन्यादरम्यान खेळाडूंनी वाहिली श्रद्धांजली

IND VS ENG 2nd Test : भारत विरुद्ध इंग्लंड कसोटी मालिकेतील दुसरा सामना बर्मिंगहॅममधील एजबॅस्टन स्टेडियमवर सुरु झाला आहे. या सामन्यामध्ये इंग्लंडचा कर्णधार बेन स्टोक्सने टॉस जिंकत प्रथम गोलंदाजी करण्याचा निर्णय घेतला. सामना सुरु होण्यापूर्वी दोन्ही संघांचे खेळाडू मैदानात उतरले. सर्व खेळाडूंच्या दंडाला काळी पट्टी बांधल्याचे पाहायला मिळाले. खेळाडूंसह सर्वजणांनी माजी इंग्लिश क्रिकेटपटू वेन लार्किन यांना श्रद्धांजली वाहिली.

भारत विरुद्ध इंग्लंड दुसऱ्या कसोटी सामन्यादरम्यान वेन लार्किन यांना श्रद्धांजली वाहण्यासाठी खेळाडूं काळी पट्टी बांधून मैदानात उतरले. २८ जून २०२५ रोजी वेन लार्किन यांनी जगाचा निरोप घेतला. बऱ्याच काळापासून ते गंभीर आजाराने ग्रस्त होते. वयाच्या ७१ व्या वर्षी वेन लार्किन यांची प्राणज्योत मालवली. त्यांच्या निधनाच्या बातमीमुळे क्रिकेटजगतात शोककळा पसरली आहे.

१९७९ ते १९९१ या दरम्यान वेन लार्किन इंग्लंड संघाकडून १३ कसोटी आणि २५ वनडे सामने खेळले होते. त्यांनी २५ कसोटी डावांमध्ये २०.५४ च्या सरासरीने ४८३ धावा केल्या होत्या. २४ एकदिवसीय सामन्यांमध्ये वेन यांनी २४.६२ च्या सरासरीने ५९१ धावा केल्या. वेन लार्किन यांनी नॉर्थम्प्टनशायर, डरहम आणि बेडफोर्डशायर या संघांचे प्रतिनिधित्व केले होते.

वेन लार्किन यांनी देशांतर्गत क्रिकेटमध्ये एकूण ४८२ प्रथम श्रेणी आणि ४८५ लिस्ट ए सामन्यांमध्ये भाग घेतला होता. प्रथम श्रेणी क्रिकेटमध्ये खेळताना त्यांनी ८४२ डावांमध्ये ३४.४४ च्या सरासरीने २७१४२ धावा केल्या होत्या. तर लिस्ट ए क्रिकेटमध्ये ४६७ डावांमध्ये वेन लार्किन यांनी ३०.७५ च्या सरासरीने १३५९४ धावा केल्या होत्या.