आयपीएल २०२४ स्पर्धेतील ६४ वा सामना लखनऊ सुपर जायंट्स आणि दिल्ली कॅपिटल्स या दोन्ही संघांमध्ये पार पडला. हा सामना लखनऊ सुपर जायंट्स संघासाठी जिंकणं अतिशय महत्वाचं होतं. मात्र या सामन्यात दिल्लीने शानदार कामगिरी केली आणि हा सामना १९ धावांनी जिंकला आहे. या विजयाचा रॉयल चॅलेंजर्स बंगळुरू आणि राजस्थान रॉयल्स संघाला मोठा फायदा झाला आहे.
दिल्लीच्या अरुण जेटली स्टेडियमवर पार पडलेल्या या सामन्यात लखनऊ सुपर जायंट्स संघाने नाणेफेक जिंकला आणि प्रथम गोलंदाजी करण्याचा निर्णय घेतला. दिल्ली कॅपिटल्स संघाकडून प्रथम फलंदाजी करताना इम्पॅक्ट प्लेअर म्हणून फलंदाजीला आलेल्या अभिषेक पोरेलने सर्वाधिक ५८ धावांची खेळी केली. तर ट्रीस्टन स्टब्सने नाबाद ५७ धावांची खेळी केली. तर शाई होपने ३८ आणि रिषभ पंतने ३३ धावा करत संघाची धावसंख्या २० षटक अखेर ४ गडी बाद २०८ धावांवर पोहचवली.
लखनऊ सुपर जायंट्स संघाला हा सामना जिंकण्यासाठी २०९ धावांची गरज होती. या धावांचा पाठलाग करताना लखनऊच्या फलंदाजांना हवी तशी सुरुवात करून देता आली नाही. क्विंटन डीकॉक १२ तर केएल राहुल ५ धावांवर बाद होऊन माघारी परतला. मार्कस स्टोइनिस ५ तर दीपक हुड्डा शून्यावर बाद होऊन माघारी परतला. संघ अडचणीत असताना निकोलस पुरनने शानदार खेळी करत २७ चेंडूत ६१ धावा चोपल्या. शेवटी अरशद खानने एकाकी झुंज देत संघाला विजयाच्या जवळ नेलं. मात्र त्याला साथ मिळाली नसल्याने लखनऊला हा सामना गमवावा लागला आहे.
लखनऊ सुपर जायंट्स संघाच्या कामगिरीबद्दल बोलायचं झालं तर, या संघाने १३ सामने खेळले आहेत. यापैकी ७ सामने गमावले आहेत. या संघाचे सध्या १२ गुण आहेत. दिल्लीच्या विजयामुळे रॉयल चॅलेंजर्स बंगळुरू संघाचा प्लेऑफमध्ये जाण्याचा चान्स वाढला आहे. तर राजस्थान रॉयल्सने प्लेऑफमध्ये प्रवेश केला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.